20 лістапада папа Францішак сустрэўся з прадстаўнікамі Галоўнага ўпраўлення дарожнай і чыгуначнай паліцыі Італіі. Пантыфік заўважыў, што ў свеце, дзе мабільнасць стала надзённай неабходнасцю, патрэбна гарантаваць бяспеку перамяшчэння.
Святы Айцец звязвае неадказныя паводзіны на дарогах з мітуслівасцю і павышанай канкурэнцыяй сённяшняга ладу жыцця. Праблемы ў чыгуначным сектары, які Пантыфік назваў ключавым у жыцці краіны, могуць ствараць нязручнасці для мільёнаў пасажыраў і падарожнікаў. Папа падзякаваў паліцэйскім за тое, што, сустракаючыся з самымі разнастайнымі рэаліямі, яны гарантуюць бяспеку, прадухіляючы і спыняючы злачынствы.
Як падкрэсліў Папа, важна, каб прымяненне сілы ніколі не спалучалася з насіллем. Для гэтага патрэбна вялікая мудрасць і самавалоданне. На жаль, сёння паліцэйскі часта ўспрымаецца з падазрэннем або нават варожасцю, а не ў якасці гаранта агульнага дабра. Папа Рымскі заклікаў праваахоўнікаў да «міласэрнага стылю», вольнага ад помсты і агрэсіі, які характарызуецца разуменнем патрэб і матываў чалавека.
Важна прызнаць рэальнасць бітвы паміж дабром і злом, якая адбываецца ў свеце і ўнутры нас, адзначыў Папа, спасылаючыся на постаць апекуна паліцыі — св. Міхала Арханёла. Святы Айцец заклікаў ніколі не пагаджацца на зло і супрацьстаяць эгаізму, несправядлівасці, абыякавасці на першай лініі фронту, дзе заўсёды знаходзяцца паліцэйскія.
