Дзяржаўны Сакратар Святога Айца кардынал П’етро Паралін падчас прэс-канферэнцыі па выніках перамоваў з кіраўніком Міністэрства замежных спраў РФ Сяргеем Лаўровым адзначыў, што Расія можа спрыяць урэгуляванню крызісу ў Венесуэле.
24 жніўня завяршаецца чатырохдзённы візіт ватыканскага іерарха ў Расію.
«Я думаю, што Расія можа дапамагчы ў гэты сумны момант, бо ўжо даўно працягваецца гэтая цяжкая сітуацыя. Паколькі Расія і Венесуэла маюць цесныя адносіны, думаю, што Расія можа спрыяць перамовам», — лічыць кардынал Паралін.
Па словах іерарха, перамовы — гэта адзіны спосаб, які бачыць Ватыкан для вырашэння венесуэльскага крызісу. «Таму неабходна працаваць з бакамі, якія супрацьстаяць, на кіраўнічым узроўні і разам паспрабаваць адшукаць супольны шлях, каб вырашыць праблемы, якія перажывае цяпер Венесуэла», — сцвердзіў прадстаўнік Папы.
Сяргей Лаўроў, у сваю чаргу, адзначыў, што ўрэгуляваць венесуэльскі крызіс могуць дапамагчы многія знешнія гульцы. «Галоўнае, каб усе знешнія сілы заклікалі бакі, якія цяпер супрацьстаяць адзін аднаму ў Венесуэле, да нацыянальнай згоды ў выпрацоўцы кампрамісаў, якія дазволяць спакойна развіваць сваю краіну з улікам інтарэсаў усіх слаёў грамадства, усіх палітычных сіл», — падкрэсліў міністр замежных спраў Расіі.
