Папа Францішак прызначыў Дзяржсакратара кардынала П’етро Параліна сваім легатам на ўрачыстасці з нагоды 800-годдзя кансэкрацыі базылікі цыстэрцыянскага абацтва Казамары ў італьянскім рэгіёне Лацыё. Святкаванні пройдуць 15 верасня.
Абацтва з’яўляецца адным з важнейшых духоўных цэнтраў і помнікаў гатычнага мастацтва ў Італіі. Яно знаходзіцца ў 100 км на поўдзень ад Рыма. Будаўніцтва гэтага кляштарнага комплексу пачалося ў 1203 г., а завяршылася ўрачыстым асвячэннем касцёла ў 1217 г. У чэрвені 1957 г. Пій ХІІ надаў яму тытул малой базылікі.
Асноўным пакліканнем мясцовых манахаў з’яўляецца малітва. Акрамя гэтага, яны заняты рознымі іншымі відамі дзейнасці: выкладаннем у заснаваным тут у 1898 г. тэалагічным Інстытуце св. Бэрнарда, вытворчасцю лекаў, налівак і гандлем імі, друкаваннем і рэстаўрацыяй кніг, кіраваннем археалагічным музеем і бібліятэкай, у якой захоўваецца каля 540 тысяч выданняў.
У 1929 г. абацтва Казамары, разам з іншымі кляштарамі, якія былі заснаваны па яго прыкладзе, набыло статус аўтаномнай манаскай кангрэгацыі, аб’яднанай з Ордэнам цыстэрцыянцаў. На дадзены момант у ім пражывае 16 манахаў.
