У Італіі абнародаваны вынікі новага даследвання, якое правялі вучоныя з дапамогай нядаўна распрацаваных метадаў у галіне электроннай мікраскапіі. Як высветлілі эксперты, Турынская плашчаніца заплямлена крывёю чалавека, які пакутаваў ад цяжкіх траўм — магчыма, ад катаванняў.
Пра гэта са спасылкай на The Daily Mail паведамляе TUT.BY.
Плашчаніца — гэта чатырохметровае ільняное палатно. На ім праступае фігура чалавека. Паводле традыцыі, Юзаф з Арымафеі загарнуў у плашчаніцу цела Хрыста пасля яго пакутаў на крыжы і смерці. Цяпер у вернікаў з’явіліся навуковыя аргументы.
Прафесар Універсітэта Падуі Джуліё Фанці і іншыя даследчыкі вывучылі склад тканіны. Фанці сцвярджае, што ў дробных часцінках крыві, якія засталіся на плашчаніцы, утрымліваюцца высокія ўзроўні двух рэчываў — крэацініна і ферыціна. Яны выяўляюцца ў пацыентаў, якія пакутуюць ад моцных траўм, такіх як катаванні.
«Такім чынам прысутнасць гэтых біялагічных наначасцінак, выяўленых падчас нашых эксперыментаў, указвае на гвалтоўную смерць чалавека, загорнутага ў Турынскую плашчаніцу», — кажа Фанці.
