26 жніўня ў Рыме распачаўся чарговы, 86-ы Генеральны капітул Ордэна Меншых Братоў Капуцынаў.
Кустодыю Беларусі на ім прадстаўляе яе настаяцель, брат кусташ Алег Шэнда OFMCap.
Агульная асамблея гэтай вялікай манаскай супольнасці сёлета сабрала ў Вечным горадзе 172-х дэлегатаў са шматліх краін свету, дзе нясуць служэнне капуцыны. Удзельнікі Генеральнага капітулу разам усебакова абмяркоўваюць актуальную сітуацыю Ордэна і ягоную будучыню.
Акрамя вызначэнне перспектывы развіцця капуцынскай харызмы, адным з асноўных заданняў дэлегатаў Капітула з’яўляецца абранне Генеральнага настаяцеля Ордэна і яго раднікаў на чарговыя шэсць гадоў.
Цэлебрацыю святой Імшы, якой распачалася сусветная сустрэча братоў капуцынаў, узначаліў біскуп Паоло Марцінэллі OFMCap, Апостальскі вікарый Саудаўскай Аравіі, які падзяліўся вопытам прысутнасці братоў капуцынаў у рэгіёне з традыцыйна нехрысціянскай культурай.
У сваю чаргу, пасля афіцыйнага адкрыцця пасяджэння Капітула, да братоў-дэлегатаў звярнуўся з прамовай кардынал Ран’еро Канталамэса OFMCap, шматгадовы прапаведнік Папскага дома, які месяц таму адсвяткаваў сваё дзевяностагоддзе.
Ён падзяліўся, што з дванаццацігадовага ўзросту ягонаму жыццю спадарожнічаюць браты капуцыны, і з вышыні набытага вопыту заахвоціў братоў-дэлегатаў Капітула смела спадзявацца на дзеянне Святога Духа і адважна прымаць рашэнні на карысць развіцця капуцынскай харызмы ў сучасным свеце.
