17 сакавіка ў Індыі 111 жанчын, дзяўчат і дзяўчынак на працягу дзвюх гадзін прадстаўлялі 111 розных аб’яўленняў Маці Божай.
«Жывая выстава» пад назваю «Maria Divina — 11 адценняў ласкі», кожная ўдзельніца якой была апранута ў строй Багародзіцы, адбылася ў парафіі святога Тамаша ў Бангалоры на поўдні Індыі, трэцім па велічыні горадзе краіны і пабраціме Мінска.
Як адзначае Польская рэдакцыя парталу Vatican News, маштабнае мерапрыемства, мэтай якога было паказаць разнастайнасць Марыйных аб’яўленняў, рыхтавалі каля трохсот чалавек на працягу года.
Першую ў свеце такую «жывую выставу» адкрылі арцыбіскуп Бангалора Пітэр Мачада і біскуп Мандыі Себасцьян Адаянтратм.
Незвычайнае мерапрыемства нават трапіла ў спіс «Лепшых рэкордаў Індыі».
Аднак галоўнай мэтай выставы было імкненне будаваць супольнасць вернікаў, і, як прызналася ў інтэрв’ю Ватыканскаму радыё адна з яго арганізатараў Даяна Пол, гэтага ў значнай ступені ўдалося дасягнуць.
«Гэта было чарговае мерапрыемства, на якім большасць нашых маладых членаў сустрэлася, і мы маглі яшчэ лепш будаваць нашу супольнасць. Мы працавалі разам, і ў нас з’явілася шмат успамінаў. Няхай гэта стане нашым духоўным узрастаннем і спосабам таго, як мы можам вучыцца адзін ад аднаго розным рэчам», — сказала жанчына.
Яна дадала, што ўзаемадапамога часта заключалася ў абмене думкамі «адносна прадстаўлення, строяў і таго, як арганізаваць такое вялізнае мерапрыемства і зрабіць яго выдатным». Яна зазначыла, што над выставай працавала сапраўды вялікая каманда.
«Ва ўсім гэтым многія з нас маглі даведацца пра розныя аб’яўленні Найсвяцейшай Панны, а потым мы мелі вельмі асабістыя сустрэчы з гэтымі аб’яўленнямі Марыі — рознымі, хоць Маці Божая адна. Мы маглі пазнаёміцца са 111-ю аб’яўленнямі Багародзіцы і, шчыра кажучы, гэта быў непаўторны вопыт», — прызналася Даяна Пол.
