Па запрашэнні расійскага каталіцкага епіскапату з 16 па 19 лістапада арцыбіскуп эмэрыт Тадэвуш Кандрусевіч наведаў Санкт-Пецярбург.
16 лістапада заслужаны беларускі іерарх узяў удзел у распачацці новага акадэмічнага года ў Вышэйшай духоўнай семінарыі «Марыя Каралева апосталаў». Цэлебрацыю святой Імшы з гэтай нагоды ўзначаліў арцыбіскуп архідыяцэзіі Маці Божай у Маскве Павел Пэццы.
На заканчэнне цэлебрацыі біскупы ўдзялілі благаслаўленне будучым святарам.
На наступны дзень высокі госць з Беларусі ўзначаліў святкаванне 30-годдзя служэння сясцёр францішканак місіянерак Марыі ў Расіі, якое адбылося ў капліцы іх дома.
У прамоўленай гаміліі падчас Імшы арцыбіскуп Кандрусевіч падкрэсліў «шмтавектарнае служэнне сяцёр» у Санкт-Пецярбургу: катэхізацыя, евангелізацыя, дабрачыннасць, падрыхтоўка катэхетычных матэрыялаў, касцёльны суд, сакрыстыя і іншае.
«Сваёй прысутнасцю і служэннем сёстры сталі светачам у паўночнай сталіцы Расіі у грамадстве, якое секулярызуецца і мае вострую патрэбу ў Божым слове і прыкладзе хрысціянскага служэння», — падкрэсліў беларускі іерарх які з 1991 па 2007 год нёс пастырскае служэнне ў Расіі.
Арцыпастыр пажадаў сёстрам Божага благаслаўлення і поспеху, «каб будучыя пакаленні ўспаміналі іх як тых, без каго не было б адраджэння веры і яе сведчання».
