24 кастрычніка ў горадзе Тальяці адбылося пасвячэнне касцёла, які стаў першай у Расіі святыняй у гонар святога Яна Паўла ІІ.
Як паведамляе рускамоўная суполка Вк, прысвечаная святому Папу Яну Паўлу ІІ, за два дні да пасвячэння касцёла, акурат у дзень літургічнага ўспаміну вялікага Папы-славяніна, быў атрыманы афіцыйны дакумент аб уводзе новазбудаванай святыні ў эксплуатацыю.
Цяпер мясцовая рыма-каталіцкая парафія Маці Божай Фацімскай мае сваю прыгожую святыню, размешчаную ў цэнтральнай частцы горада.
Пасвячэнне касцёла здзейсніў біскуп дыяцэзіі святога Клімэнта ў Саратаве Клеменс Пікель, які з гэтай нагоды ўзначаліў цэлебрацыю ўрачыстай святой Імшы. Разам з ім Эўхарыстыю цэлебравалі пробашч тальяцінскай парафіі ксёндз Зянон Генец і іншыя святары з розных расійскіх гарадоў.
У ліку ганаровых гасцей на святой Імшы прысутнічаў пасол Польшчы ў Расійскай Федэрацыі Кшыштаф Краеўскі і рэктар Паволжскага праваслаўнага інстытута протаіерэй Дзмітрый Лескін, якія звярнуліся да сабраных з цёплымі прывітальнымі словамі.
Пасля Імшы мясцовыя парафіяне пачаставалі ўсіх удзельнікаў урачыстасці смачным пловам.
