Як і ў мінулым годзе, у Вялікую суботу, якая сёлета прыпадае на 3 красавіка, адбудзецца спецыяльнае выстаўленнне ўнікальнай рэліквіі хрысціянства — Турынскай плашчаніцы. Паводле падання, у гэтую тканіну было захінута цела знятага з крыжа Хрыста.
Пра спецыяльнае выстаўленне Плашчаніцы паведаміў арцыбіскуп Турынскі Чэзарэ Назілья, на якога спасылаецца беларуская рэдакцыя парталу Vatican News.
Набажэнства распачнецца ў 16.30 па Сярэднееўрапейскім часе і будзе транслявацца ў СМІ дзякуючы супрацоўніцтву з Дыкастэрыяй па камунікацыі Святога Пасаду.
Малітву перад Плашчаніцай у Вялікую суботу правядуць маладыя людзі з Турына, якія ўдзельнічалі ў падрыхтоўцы да еўрапейскай сустрэчы моладзі Тэзэ.
Сустрэчу планавалася правесці ў Турыне з 28 снежня 2020 г. па 1 студзеня 2021 г., але яна была адкладзена з прычыны выкліканых пандэміяй санітарных абмежаванняў. Падчас выстаўлення плашчаніцы моладзь прапануе свае разважанні на тэму надзеі.
