Кіраўнікі некаторых касцёльных структур прынялі рашэнне часова прыпыніць Імшы з удзелам вернікаў у сувязі з сур'ёзнай эпідэміялагічнай сітуацыяй.
Як паведаміла 11 студзеня руская рэдакцыя парталу Vatican News, у Вялікабрытаніі ўжо ў трэці раз уведзены жорсткія каранцінныя меры ў сувязі з пандэміяй і, у прыватнасці, з «англійскай версіяй» каранавірусу. Таму каталіцкія біскупы Паўночнай Ірландыі абнародавалі спецыяльную заяву, выразіўшы заклапочанасць у сувязі з цяжкай эпідэміялагічнай сітуацыяй у краіне.
Прызнаючы прыкладзеныя шматлікімі парафіямі ўмовы па забеспячэнні магчымасці ўдзелу вернікаў у набажэнствах у максімальнай бяспецы для здароўя, іерархі цалкам падтрымліваюць заклік санітарных уладаў абмежаваць сустрэчы паміж людзьмі да мінімуму і рэкамендацыю заставацца дома, наколькі гэта магчыма, «у імя здароўя, жыцця і агульнага дабра».
Паўночнаірландскія біскупы абвясцілі, што да 6 лютага (гэтая дата можа быць перагледжана ў канцы студзеня) будзе прыпынены ўдзел вернікаў у Эўхарыстыі і іншых набажэнствах.
«Мы прымаем гэтае рашэнне з вялікім жалем, — тлумачаць іерархі. — Мы ўсведамляем, што немагчымасць збірацца для публічнага культу можа быць балючай для ўсіх вернікаў, але мы спадзяемся, што гэты кароткі перыяд ахвяры абароніць жыццё, здароўе і дабро ўсіх». Біскупы дадаюць, што падобныя рашэнні ўжо прыняты пратэстанцкімі Цэрквамі.
У бразільскім горадзе Манаус Імша з удзелам вернікаў не будзе цэлебравацца да 22 студзеня: гэтае рашэнне прыняў арцыбіскуп Леанарду Улрыш Штайнер у сувязі з цяжкай эпідэміялагічнай сітуацыяй. Набажэнствы з удзелам вернікаў спынены таму, што «мы не можам не клапаціцца пра жыццё людзей, асабліва самых уразлівых», патлумачыў арцыбіскуп. Бразільскі ўрад уключыў Касцёл у лік неабходных відаў дзейнасці, і святыні могуць быць адчынены пры ўмове, што яны запоўнены на 30 працэнтаў.
Арцыбіскуп Штайнер вырашыў, што Імша будзе цэлебравацца без удзелу вернікаў, але святыні будуць адчынены для адарацыі Найсвяцейшага Сакрамэнту і асабістай малітвы.
Іерарх адзначыў, што ў перыяд Божага Нараджэння абмежавальныя меры былі аслаблены, таму цяпер неабходна паклапаціцца аб здароўі адзін аднаго.
