25 лістапада было афіцыйна паведамлена, што Папа Францішак зацвердзіў пастанову Сіноду біскупаў Украінскай Грэка-Каталіцкай Царквы (УГКЦ) і абвясціў аб стварэнні новай структуры — Ольштынска-Гданьскай епархіі ў Польшчы.
Пра гэта паведамляе Дэпартамент інфармацыі Украінскай Грэка-Каталіцкай Царквы.
Цэнтрам новай епархіі стане горад Ольштын, а катэдрай — царква Пакрава Святой Багародзіцы.
Новая грэка-каталіцкая епархія ў Польшчы ўтворана на частцы тэрыторыі Пярэмышльска-Варшаўскай архіепархіі і ранейшай Уроцлаўска-Гданьскай епархіі. Пры гэтым назва апошняй была зменена на Уроцлаўска-Кашалінскую епархію.
Першым біскупам новастворанай Ольштынска-Гданьскай епархіі быў намінаваны айцец Аркадзь Траханоўскі, святар парафіі Узвышэння Хвалебнага Крыжа ў Валчы, протапрэзбітэр Кашалінскага дэканату. Да моманту яго біскупскага пасвячэння, дата якога пакуль не прызначана, Апостальскім адміністратарам новай епархіі будзе Мітрапаліт Пярэмышльска-Варшаўскі арцыбіскуп Яўген Паповіч.
