2 красавіка спаўняецца 15 гадоў з моманту адыходу святога Яна Паўла ІІ у дом Нябеснага Айца. Напярэдадні яго шматгадовы асабісты сакратар і найбліжэйшы супрацоўнік кардынал Станіслаў Дзівіш заклікаў суайчыннікаў да акцыі памяці і малітвы аб спыненні пандэміі.
Ён прапануе 2 красавіка ў 21.37, калі перастала біцца сэрца Вялікага Папы, запаліць свечкі ў вокнах дамоў, просячы Міласэрнага Бога аб спыненні пандэміі каранавірусу праз заступніцтва святога Яна Паўла ІІ.
«Калі 15 гадоў таму святы Ян Павел ІІ адыходзіў у дом Айца, на плошчы Святога Пятра ў Ватыкане, у касцёлах і капліцах ва ўсім свеце, на плошчах гарадоў і каля прыдарожных крыжоў мільёны чалавечых сэрцаў трывалі ў вялікім малітоўным чуванні.
Нашыя вуліцы і святыні напаўняў ціхі шэпт засяроджаных у малітве людзей, якія жадалі ў гэтыя дні быць разам і духоўна ядналіся вакол канаючага Папы, каб суправаджаць яго сваёй любоўю і такім чынам падзякаваць за дар яго жыцця і святасці», — піша кардынал Дзівіш у паведамленні, перададзеным Каталіцкаму інфармацыйнаму агенцтву .
«Ён ведаў пра тое, што адыходзіць у атачэнні вялікай сям’і, як бацька сярод любячых дзяцей», — дадае былы асабісты сакратар Яна Паўла ІІ.
Ён прызнаецца, што вяртаецца ў памяці да тых хвілін адзінства, калі сёння глядзіць на апусцелую плошчу Святога Пятра, калі бачыць «пустыя святыні і вымерлыя вуліцы».
«Свет спыніўся так, як спыніўся 15 гадоў таму. Тады мы адчулі, што асірацелі, аднак змаглі падтрымліваць адно аднаго і шукаць суцяшэння ў Богу, які ёсць Крыніцаю Жыцця.
Ці зможам мы і сёння гэтаксама, як тады, трываць ва ўзаемнай любові, у агульных для нас болю і тузе? Ці зможам шукаць надзею і чэрпаць сілы з праўды, што, хоць сёння і не можам фізічна сустрэцца, аднак наша супольнасць — рэальная і існуе, нягледзячы на зачыненыя дзверы нашых дамоў?» — задае пытанні сваім суайчыннікам польскі кардынал.
Даць на іх адказ ён прапануе, з’яднаўшыся 2 красавіка ў 21.37 у супольнай малітве праз заступніцтва святога Яна Паўла ІІ і просячы аб спыненні пандэміі каранавірусу.
«Прашу вас усіх, дарагія браты і сёстры, каб у 15-ю гадавіну адыходу Яна Паўла ІІ у дом Айца мы зноў з’ядналіся вакол яго.
Вельмі вас прашу, каб ніхто не быў адсутны ў гэтай духоўнай супольнасці 2 красавіка ў 21.37. Няхай узнясецца ў нябёсы нашая малітва даверу», — заахвочвае кардынал Станіслаў Дзівіш і заклікае на знак малітоўнага адзінства запаліць свечы ў вокнах дамоў.
Разам з тым найбліжэйшы супрацоўнік Вялікага Папы прапануе прачытаць Акт даручэння Божай Міласэрнасці, які ён сам нядаўна здзейсніў у санктуарыі ў Лагеўніках, што пад Кракавам.
Акт даручэння Божай Міласэрнасці
Усемагутны Божа, перад абліччам пандэміі, якая ахапіла чалавецтва, з новаю руплівасцю мы аднаўляем акт даручэння Тваёй Міласэрнасці, здзейснены святым Янам Паўлам ІІ.
Табе, міласэрны Ойча, мы даручаем лёсы свету і кожнага чалавека. Да Цябе з пакораю ўсклікаем. Благаславі ўсіх, хто працуе дзеля таго, каб лячыць хворых, а здаровых абараніць ад заразы. Вярні здароўе тым, хто захварэў, дай цярплівасць тым, хто знаходзіцца на карантыне, а памерлых прымі ў свой дом. Умацуй у здаровых пачуццё адказнасці за сябе і за іншых людзей, каб яны не парушалі неабходных абмежаванняў і прыходзілі на дапамогу патрабуючым.
Аднаві нашую веру, каб цяжкія хвіліны мы перажывалі разам з Хрыстом, Тваім Сынам, які дзеля нас стаўся чалавекам і кожны дзень ёсць з намі. Спашлі свайго Духа на ўвесь свет, каб тыя, каго з’яднала барацьба з хваробаю, з’ядналіся таксама ў праслаўленні Цябе, Стварыцеля сусвету, і рупліва змагаліся таксама з вірусам граху, які знішчае чалавечыя сэрцы.
Ойча спрадвечны, дзеля балеснай мукі і ўваскрасення Твайго Сына будзь міласэрны да нас і да ўсяго свету. О Марыя, Маці Міласэрнасці, заступіся за нас. Святы Яне Паўле ІІ, святая Фаўстына, благаслаўлёны Міхале Сапоцька і ўсе святыя Божыя, маліцеся за нас.
