27 сакавіка італьянскі епіскапат заахвочвае ўсіх біскупаў краіны ў самоце пайсці на могілкі ў сваіх дыяцэзіях, каб там памаліцца за ўсіх памерлых ад каранавірусу, многія з якіх былі пахаваныя без належных хрысціянскіх абрадаў.
Як паведаміла Каталіцкае інфармацыйнае агенцтва КАІ, гэтае самотнае наведванне могілак біскупамі павінна стаць часам засяроджання, малітоўнага чування і благаслаўлення.
«Інтэнцыя — даручэнне Божай Міласэрнасці ўсіх памерлых ад пандэміі, а таксама выраз такім чынам блізкасці Касцёла да ўсіх, хто цяпер ахоплены плачам і болем», — гаворыцца ў спецыяльным паведамленні Прэзідыюму Канферэнцыі біскупаў Італіі.
На сённяшні дзень ад хваробаў, выкліканых вірусам COVID 19, у краіне памерлі ўжо больш за сем з паловай тысяч чалавек.
У адпаведнасці з патрабаваннямі бяспекі іх целы скіроўваюцца на крэмацыю без магчымасці цэлебрацыі пахавальнай святой Імшы.
Таксама і блізкія не могуць асабіста развітацца з памерлымі, з якімі найчасцей не мелі непасрэднага кантакту з моманту іх змяшчэння ў інфекцыйным аддзяленні або ў часовым шпіталі.
У аддзяленнях, дзе знаходяцца заражаныя каранавірусам, забаронена аказанне душпастырскіх паслуг. Адна з прычын — немалады ўзрост большасці святароў і звязаная з гэтым вялікая рызыка заражэння.
Як паведаміў канал Euronews, на сённяшні дзень ахвярамі каранавірусу ў Італіі сталі ўжо 67 каталіцкіх святароў, якія свой душпастырскі абавязак паставілі вышэй за ўласнае жыццё.
