Дапаможны біскуп Мінска-Магілёўскай архідыяцэзіі Аляксандр Яшэўскі SDB у якасці прадстаўніка Касцёла на Беларусі возьме ўдзел у святкаванні 450-годдзя Люблінскай уніі, якое 29–30 чэрвеня пройдзе ў Варшаве і Любліне (Польшча).
Беларускі іерарх скіруецца на юбілейныя ўрачыстасці па запрашэнні польскіх уладаў.
Цэнтральнай часткай святкавання стане цэлебрацыя святой Імшы ў люблінскім архікатэдральным касцёле святога Яна Хрысціцеля і святога Яна Евангеліста, якая адбудзецца тут 30 чэрвеня а 10-й гадзіне.
Пасля Эўхарыстыі яе ўдзельнікі ўскладуць кветкі да помніка Люблінскай уніі на Літоўскай плошчы ў Любліне.
На юбілейных мерапрыемствах будуць прадстаўлены ўсе сучасныя дзяржавы, народы якіх абя’дналіся ў 1569 годзе ў Рэч Паспалітую — унікальнае саюзнае ўтварэнне, што стала выразам імкнення да адзінства ў разнастайнасці на падмурку трывалых хрысціянскіх каштоўнасцяў. Чакаецца, што ва ўрачыстасцях у Польшчы возьмуць удзел прадстаўнікі Касцёла і парламенцкія дэлегацыі з Беларусі, Літвы і Украіны.
