![](/3/images/news/2019/03/9519/2019-03-07--1.jpg)
Як паведаміла беларуская рэдакцыя партала Vatican News, 6 сакавіка ў ватыканскіх кнігарнях з’явіліся два статыстычных даведнікі Касцёла: Annuario Pontificio за 2019 г. і Annuarium Statisticum Ecclesiæ, у якім публікуюцца дадзеныя за 2017 г.
З апошняга выдання Annuario Pontificio — «Папскага штогодніка» — вынікае, што ў мінулым годзе былі створаны чатыры новых біскупскіх кафедры, ранг адной дыяцэзіі быў узвышаны да сталіцы мітраполіі і адной апостальскай адміністратуры да дыяцэзіі, узніклі чатыры экзархаты і епархіі.
Другі даведнік Annuarium Statisticum Ecclesiæ — «Штогоднік касцёльнай статыстыкі» — інфармуе, што ў 2017 г. у свеце было 1, 313 млрд ахрышчаных католікаў, што складае 17, 7 % насельніцтва планеты.
48,5 % з іх пражывалі ў Амерыцы, 21,8% у Еўропе, 17,8 % у Афрыцы, 11,1 % у Азіі і 0,8% у Акіяніі.
У Касцёле знізілася колькасць святароў: з 414 тыс. 969 у 2016 г. да 414 тыс. 582 у 2017 г. Затое стала больш біскупаў, дыяканаў, свецкіх місіянераў і катэхетаў. Кандыдатаў да святарства стала менш: у 2016 г. іх было 116 тыс. 160, у 2017 г. — ужо 115 тыс. 328. Такім чынам, іх колькасць скарацілася амаль на 1%.
Збіраннем апублікаваных дадзеных займаецца Цэнтральная статыстычная служба Каталіцкага Касцёла. Кошт папяровага выдання Annuario Pontificio за 2019 г. у інтэрнэт-кнігарні складае 78 еўра.