Дапамагчы людзям маладога ўзросту не стаць нявольнікамі цікаўнасці, якая прыводзіць да сустрэчы з бруднымі рэчамі ў віртуальным свеце, заклікаў папа Францішак падчас ранішняй Эўхарыстыі, якую 30 красавіка цэлебраваў у капліцы сваёй ватыканскай рэзідэнцыі.
У гаміліі Святы Айцец растлумачыў розніцу паміж добрай і кепскай цікаўнасцю. У якасці першага прыкладу ён указаў на дапытлівасць дзяцей, якія хочуць знайсці тлумачэнне рэчам, якіх не разумеюць. Гэта — добрая цікаўнасць, бо яна служыць развіццю асобы і яе «большай самастойнасці». Акрамя таго, яна з’яўляецца «сузіральнай цікаўнасцю», таму што «дзеці бачаць, сузіраюць, не разумеюць і пытаюцца», лічыць Пантыфік.
У якасці адмоўнага прыкладу цікаўнасці ён назваў пляткарства, «суванне носу» ў жыццё іншых людзей, жаданне даведацца пра тое, пра што не маем права ведаць. На думку Святога Айца, такая цікаўнасць уласцівая як жанчынам, так і мужчынам. З ёй чалавек сустракаецца на працягу ўсяго жыцця, але яе не трэба баяцца.
Важна быць пільнымі, пастанавіўшы для сябе: «пра гэта не пытаюся, на гэта не гляджу, гэтага не жадаю».
Папа падкрэсліў, што шмат кепскага існуе ў віртуальным свеце, куды маюць доступ многія дзеці, таму трэба дапамагчы ім захаваць прагу ведаў, але пры гэтым абараніць ад цікаўнасці, якая робіць нявольнікамі.
У развіцці здаровай цікаўнасці, паводле Папы, дапамагае духоўнае жыццё, адкрытасць сэрца для ласкі Святога Духа, які заўсёды дае ўпэўненасць і слушны адказ у той ці іншай сітуацыі.
«Святы Дух — гэта спадарожнік, спадарожнік на шляху хрысціяніна», — дадаў Святы Айцец.
На заканчэнне гаміліі папа Францішак заклікаў вернікаў прасіць у Бога ласкі адрознення добрай цікаўнасці ад кепскай, а таксама адкрытасці сэрца для Святога Духа, які суправаджае і дае ўпэўненасць у тым, чаму навучаў Езус Хрыстус.
