Інтэрв’ю са знакамітай амерыканскай даследчыцай, праваслаўным тэолагам і экспертам па біяэтыцы Гайле Валашак пад назвай «Жанчына ў цэнтры дыялогу паміж навукай і светам» адкрывае лістападаўскі нумар штомесячнага ватыканскага часопіса «Жанчыны. Касцёл. Свет».
Чарговы выпуск выдання цалкам прысвечаны праваслаўю і жанчынам, якія належаць да гэтай канфесіі.
Інтэрв’ю на тэму месца і ролі жанчыны ў праваслаўным тэалагічным дыскурсе і ўнёску праваслаўных багасловаў у навуковы дыялог працягваецца матэрыялам, прысвечаным значнай фігуры заходнееўрапейскага праваслаўнага мадэрнізму Элізабэце Бэр-Сіжэль, аўтару кнігі «Служэнне жанчыны ў Царкве», прыхільніцы жаночага раўнапраўя ў царкоўным жыцці і ідэі жаночага святарства ў Праваслаўнай Царкве.
Змест нумара дапаўняецца разгорнутым аповедам пра жыццё і жывы прыклад веры Маці Марыі (Елізаветы Піленка), праваслаўнай святой, маці і манахіні, якая нарадзілася ў Рызе, вырасла ў Пецярбургу, а загінула ў нямецкім канцэнтрацыйным лагеры Равенсбрук у 1943 г.
Традыцыйная рубрыка «Фокус» засяроджваецца на сужэнскім саюзе жанчыны з праваслаўным святаром, аналізуючы адметнасці, якімі характарызуецца ўнутрысямейны ўклад такой пары, і скіроўваючы ўвагу на стаўленне да гэтай з’явы з боку грамадства.
Праваслаўе натуральным чынам вядзе да аналізу рускай культуры, што ў часопісе ўвасобілася ў крытычных артыкулах, прысвечаных рускай паэтэсе Ане Ахматавай і творчасці Фёдара Дастаеўскага, творы якога, згодна з аўтарам, «праліваюць свет на сэрца праваслаўнай духоўнасці».
Папярэднія нумары часопіса «Жанчыны. Касцёл. Свет» былі прысвечаны пратэстантызму, ісламу і юдаізму.
