З новага навучальнага года ў папскіх універсітэтах у Рыме будуць выкладаць экалогію. Такім чынам будзе рэалізаваны пастулат, які папа Францішак агучыў у энцыкліцы Laudato si, дзе заахвочваў да «выхавання саюзу паміж чалавецтвам і асяроддзем».
Паводле Пантыфіка, гэта сапраўдны «адукацыйны выклік», а яго праграмы павінны «дапамагчы ўзрастаць у салідарнасці, адказнасці і клопаце, якія асноўваюцца на спагадзе».
Папскія навучальныя ўстановы ў Вечным Горадзе, якіх налічваецца сем, выпрацавалі супольную пяцігадовую праграму, якую прадставілі Святому Айцу 22 чэрвеня 2017 г. Праграма ўключае шэсць модуляў — столькі ж, колькі раздзелаў у энцыкліцы папы Францішка пра экалогію, — у якіх прапануюцца адказы на шэраг пытанняў, напрыклад: «Што адбываецца ў нашым супольным доме?», «Евангелле стварэння» або «Чалавечыя крыніцы экалагічнага крызісу».
Гэты тэматычны цыкл адрасаваны не толькі студэнтам папскіх устаноў у Рыме, але і ўсім зацікаўленым экалогіяй — духоўным і свецкім.
