30 жніўня на заканчэнне агульнай аўдыенцыі папа Францішак вітаў на ватыканскай плошчы шматлікіх пілігрымаў з усяго свету. Спецыяльнае прывітанне Святога Айца было адрасавана футбалістам і кіраўнікам бразільскага футбольнага клуба «Шапекоэнсэ».
Каманда клуба «Шапекоэнсэ» 28 лістапада 2016 г. накіроўвалася ў Калумбію на фінал Кубка Паўднёвай Амерыкі і трапіла ў авіякатастрофу. На борце самалёта знаходзіліся 77 пасажыраў. З іх засталіся ў жывых шасцёра, у тым ліку тры футбалісты: Нето, Жаксан Фолманн и Алан Рушэл.
Перад уваходам у базыліку святога Пятра Пантыфік прывітаў і абняў кожнага члена каманды, а таксама некаторых родных загінулых у авіякатастрофе. Святы Айцец паразмаўляў з трыма футбалістамі, якія выжылі, і благаславіў іх.
Спартсмены падарылі Біскупу Рыма футбольны мяч у колерах бразільскай каманды — белым і зялёным.
У інтэрв’ю Ватыканскаму радыё прэзідэнт клуба «Шапекоэнсэ» Дэвід Плініё дэ Нэс адзначыў: «Гэта шчаслівы дзень для кожнага з нас: ад трагічнага моманту авіякатастрофы папа Францішак неаднаразова выказваў нам сваю любоў. У самыя складаныя часы нашага жыцця яго блізкасць дадавала нам сіл, каб ісці далей, і сёння каманда паступова адыходзіць ад ран. Мы атрымалі благаслаўленне Папы Рымскага і за гэта дзякуем Богу».
1 верасня «Шапекоэнсэ» згуляе сяброўскі матч з італьянскай камандай «Рома» на сталічным Алімпійскім стадыёне.
