Дзяржаўны Сакратар папы Францішка кардынал П’етро Паралін 9 жніўня ў інтэрв’ю для італьянскага выдання Corriere della Sera адзначыў, што падчас свайго візіту ў Расію нагадае аб прыярытэце міру.
Кардынал Паралін падкрэсліў, што, калі нічога не зменіцца ў праграме, то падчас свайго візіту ў Расію 20-24 жніўня ён сустрэнецца з Прэзідэнтам Уладзімірам Пуціным і Патрыярхам Маскоўскім і ўсяе Русі Кірылам.
«У гэты гістарычны момант, калі мы назіраем узрастанне напружанасці і канфліктаў у розных частках свету, мір для папы Францішка і для мяне асабіста з’яўляецца безумоўным прыярытэтам», — адзначыў ватыканскі іерарх, а таксама запэўніў, што Апостальская Сталіца асабліва зацікаўлена ўсходняй часткай Еўропы, якая «павінна адыграць ролю ў імкненні да стабілізацыі кантынента і большага адзінства, уключаючы адносіны паміж Усходам і Захадам».
Кардынал Паралін выказаў перакананне, што варта выкарыстоўваць кожную нагоду, каб «заахвочваць да ўзаемнай павагі, дыялогу, а таксама супрацоўніцтва ў перспектыве ўмацавання міру».
Іерарх дадаў, што Касцёл заўсёды будзе заклікаць усіх кіраўнікоў на нашай планеце «не ставіць нацыянальныя і лакальныя інтарэсы вышэй за супольнае дабро, а таксама да пашаны міжнароднага закона». «Не закона моцы, а моцы закона», — падкрэсліў кардынал.
На пытанне пра тое, ці занепакоены Ватыкан узрастаючым напружаннем паміж Расіяй і ЗША, іерарх выказаў надзею, што абодва бакі змогуць дзейнічаць з належнай адказнасцю, каб пазбегнуць эскалацыі.
Кардынал Паралін патлумачыў, што яго візіт у Маскву не мае мэты падтрыхтаваць падарожжа папы Францішка ў Расію. «Але я хачу, каб з Божай дапамогай ён мог унесці пэўны ўклад таксама і ў гэтым кірунку», — адзначыў ватыканскі іерарх.
