8 жніўня у Ватыкане была агучана тэма 58-а Сусветнага дня міру, які будзе адзначацца 1 студзеня 2025 года.
Як паведаміла Беларуская рэдакцыя парталу Vatican News, у якасці тэмы Святы Айцец выбраў словы: «Адпусці нам правіны нашы: адары нас Тваім супакоем». На Дзень міру Папа Францішак традыцыйна прысвеціць адмысловае пасланне.
Дыкастэрыя па служэнні інтэгральнаму развіццю чалавека выдала паведамленне, у якім патлумачыла, што выбраная тэма «сугучная біблійнаму і касцёльнаму сэнсу Юбілейнага года і натхнёная, у прыватнасці, энцыклікамі Laudato si’ і Fratelli tutti, у першую чаргу паняццямі надзеі і прабачэння, сэрцам Юбілею: заклікам да навяртання, скіраваным не на асуджэнне, а на прымірэнне і ўсталяванне міру».
«Зыходзячы з рэальнасці канфліктаў і сацыяльных грахоў, ад якіх сёння пакутуе чалавецтва, абапіраючыся на надзею, уласцівую юбілейнай традыцыі адпушчэння грахоў/спісання даўгоў і ў святле рэфлексіі Айцоў Касцёла, выяўляюцца канкрэтныя напрамкі, якія могуць прывесці да такіх неабходных змен у духоўнай, маральнай, сацыяльнай, эканамічнай, экалагічнай і культурнай сферах», — гаворыцца ў ватыканскім камюніке.
«Толькі на падставе сапраўднага асабістага, грамадскага, міжнароднага навяртання зможа расквітнець сапраўдны мір, які праявіцца не толькі ў вырашэнні канфліктаў, але і ў выглядзе новай рэальнасці, у якой будуць аздараўляюцца раны і прызнавацца годнасць кожнага чалавека», — адзначаецца ў паведамленні ведамства Святога Пасаду.
