Кардынал Матэо Дзупі скіраваўся ў Кіеў у якасці спецыяльнага пасланніка Папы Францішка.
Як паведаміла Беларуская рэдакцыя парталу Vatican News, гэты высокі італьянскі іерарх правядзе ў сталіцы Украіны два бліжэйшыя дні з міратворчай місіяй.
«5–6 чэрвеня 2023 года кардынал Матэо Марыя Дзупі, арцыбіскуп Балонскі і старшыня Канферэнцыі біскупаў Італіі, наведае Кіеў у якасці пасланніка Святога Айца Папы Францішка.
Гаворка ідзе пра ініцыятыву, галоўная мэта якой — глыбока выслухаць украінскія ўлады аб магчымых шляхах дасягнення справядлівага міру і падтрымаць жэсты чалавечнасці, якія маглі б паспрыяць паслабленню напружанасці», — інфармуе Прэс-служба Святога Пасаду.
20 мая афіцыйны прадстаўнік Святога Пасаду Матэо Бруні пацвердзіў, што Папа Францішак даручыў кардыналу Матэо Дзупі «ўзначаліць, ва ўзгадненні з Дзяржаўным сакратарыятам, місію, якая магла б спрыяць аслабленню напружанасці ў канфлікце ва Украіне, у надзеі, якая ніколі не пакідала Святога Айца, што гэта зможа ініцыяваць мірныя шляхі».
Непасрэднай задачай міратворчай місіі кардынала Матэо Дзупі з’яўляецца не пасярэдніцтва, а садзейнічанне стварэнню атмасферы, якая магла б прывесці да мірнага ўрэгулявання, адзначаў у размове з журналістамі 26 мая кардынал Дзяржсакратар П’етро Паралін.
