Фота: Vatican Media
1 верасня адбылася сустрэча Святога Айца Папы Францішка з арцыбіскупам Антэ Ёзічам, Апостальскім нунцыем у Беларусі.
Пра гэта са спасылкай на прэс-службу Святога Пасаду паведаміла Беларуская рэдакцыя парталу Vatican News,
Аб змесце размовы падчас аўдыенцыі, якая адбылася раніцай у Апостальскім палацы, не паведамляецца.
Арцыбіскуп Ёзіч з’яўляецца прадстаўніком Папы Францішка ў Беларусі з 21 мая 2020 года. У Беларусь для выканання сваёй місіі іерарх, які паходзіць са Спліт-Макарскай архідыяцэзіі ў Харватыі, прыбыў 11 кастрычніка таго ж года, стаўшы сёмым Апостальскім Нунцыем у незалежнай Беларусі.
Сёлета адзначаецца 30-годдзе ўсталявання дыпламатычных адносін паміж Святым Пасадам і Рэспублікай Беларусь.
