Афіцыйны сімвал падарожжа Папы Францішка ў Канаду, якое пройдзе 24–30 ліпеня, распрацаваў 45-гадовы Шон Вінсэн, графік-дызайнер з метыскай супольнасці правінцыі Манітоба.
Як паведаміла Беларуская рэдакцыя парталу Vatican News, лагатып адлюстроўвае дэвіз пілігрымкі: «Ісці разам» — Marcher ensemble (па-французску) і Walking Together (па-англійску). Мастак стварыў яго ў форме сіняга кола, якое сімвалізуе рух, унутры якога змешчаны знак метысаў, стылізаваныя выявы арла, рыб, паўночных аленяў, канадскіх раслін і стыхій прыроды, а ў верхняй частцы — голуб як сімвал Святога Духа і ключы святога Пятра.
Шон Вінсэн патлумачыў, што галоўным чынам імкнуўся паказаць супольнасць.
«Куды б мы ні пайшлі па гэтым шляху аздараўлення і прымірэння, мы ідзем разам», — сказаў ён, дадаючы, што, калі ствараў лагатып натхняўся прыродай сваёй роднай зямлі, сваімі каранямі і традыцыямі, думкамі пра сям’ю, сяброў, продкаў.
Мастак прызнаўся, што атрымаўшы прапанову распрацаваць сімвал гістарычнага візіту Пантыфіка ў Канаду, спачатку вагаўся, адчуваючы вялікую адказнасць, але потым, параіўшыся са старэйшынамі сваёй супольнасці і сям’ёй, пагадзіўся ўзяць удзел у гэтай місіі. Вінсэн займаецца графічным дызайнам з 2007 года і ўжо стварыў шмат лагатыпаў для розных арганізацый і структур абарыгенаў.
