На 17–19 лютага 2022 года запланавана правядзенне тэалагічнага сімпозіума на тэму «Да фундаментальнай тэалогіі святарства», які арганізуе Святы Пасад.
Прэфект Кангрэгацыі па справах Біскупаў кардынал Марк Уэлле ўказвае на актуальнасць і вялікае значэнне гэтага форуму, пасланне якога скіравана найперш да біскупаў усяго свету.
«Касцёл сёння знаходзіцца ў складанай сітуацыі, ёсць у ім моцныя, хоць і павярхоўныя напружанні. Каб іх перамагчы, мы маем пільную патрэбу ў глыбокай тэалагічнай рэфлексіі пра таямніцу Касцёла, паслугі і харызмы ў супольнасці ахрышчаных», — адзначыў у размове з Vatican News кардынал Уэлле.
Падчас прэзентацыі запланаванага сімпозіума ватыканскі іерарх заўважыў, што, нягледзячы на патрабаванні пастулатаў так званага «сінадальнага шляху» ў Германіі, у цэнтры форуму не будзе такіх тэм, як адмена цэлібату.
Як падкрэсліў іерарх, арганізатары перакананыя ў каштоўнасці святарскага цэлібату.
«Галоўнай мэтай гэтага сімпозіума будзе паглыбленае тэалагічнае разважанне. Гэта будзе падзея тэарэтычнага характару. Яе ўдзельнікі — вельмі кампетэнтныя асобы ў гэтай сферы. Гэта будуць сапраўдныя тэалагічныя дэбаты, якія, тым не менш, прызначаны для ўсіх, — адзначыў ватыканскі іерарх. — Мы лічым, што ў нас атрымаецца абудзіць моладзь, якая ўключыцца ў жыццё Касцёла ў імя атрыманага хросту, а таксама паклікання да канкрэтнага служэння».
