Плануецца, што ў першым квартале 2021 года Папа Францішак зацвердзіць новы дакумент — Дырэкторый, які будзе рэгуляваць адносіны паміж біскупамі і кансэкраванымі асобамі.
Як паведамляе Каталіцкае інфармацыйнае агенцтва КАІ, Дырэкторый прыйдзе на змену інструкцыі Mutuæ relationes, што з’явілася 42 гады таму, і над пераглядам якой ужо даўно працуюць у Ватыкане.
Пра гэта распавёў арцыбіскуп Хасэ Радрыгес Карбальё, Сакратар Кангрэгацыі па справах Інстытутаў кансэкраванага жыцця і Таварыстваў апостальскага жыцця.
У сваёй прамове падчас віртуальнага пасяджэння Аб’яднання Генеральных Настаяцеляў, якое праходзіла з 25 па 27 лістапада, іерарх паведаміў, што працоўная назва чаканага дакументу гучыць: «Дырэкторый на тэму адносін паміж біскупамі і кансэкраваным жыццём у камуніі і місіі Касцёла».
Яго падрыхтоўка праходзіць у супрацоўніцтве з Кангрэгацыяй па справах Біскупаў. Перад тым, як дакумент будзе апублікаваны, яго разгледзяць у Дзяржаўным Сакратарыяце, Кангрэгацыі Веравучэння і ў Папскай радзе заканадаўчых тэкстаў.
Дырэкторый падзяляецца на тры часткі: тэалагічную, юрыдычную і душпастырскую, у якой адбудзецца найбольш змен у параўнанні з папярэдняй інструкцыяй Mutuæ relationes.
Менавіта ў гэтай душпастырскай частцы Дырэкторыя плануецца даць адказ на магчымыя праблемы ў адносінах паміж біскупамі і прадстаўнікамі манаскіх супольнасцяў. Тут жа пойдзе гаворка і пра «месца для кансэкраваных жанчын», — сказаў арцыбіскуп Карбальё.
