![](/3/images/news/2020/05/2020-05-27-Papa-Francesco-benedice-Piazza-San-pietro-vuota.jpg)
31 мая, у нядзелю Спаслання Духа Святога, вернікі пасля доўгага перапынку змогуць узяць удзел у супольнай малітве апоўдні на плошчы Святога Пятра разам з Папам Францішкам, які зноў традыцыйна правядзе яе ля вакна Апостальскага палацу.
Як са спасылкай на прэс-службу Святога Пасаду паведаміла польская рэдакцыя парталу Vatican News, у бліжэйшую нядзелю Папа Францішак а 10-й гадзіне будзе цэлебраваць святую Імшу ў капліцы Найсвяцейшага Сакрамэнту ў базыліцы святога Пятра, пасля чаго апоўдні разам з вернікамі, сабранымі пасля больш як двухмесячнага перапынку на плошчы Святога Пятра, разам прамовіць малітву «Валадарка неба».
У нядзелю 8 сакавіка Святы Айцец з увагі на абвастрэнне пандэміі каранавірусу ўпершыню прамовіў марыйную малітву апоўдні з бібліятэкі Апостальскага палацу без удзелу вернікаў. Тады Папа Францішак сказаў:
«Сёння гэтая малітва „Анёл Панскі“ крыху іншая, з Папам, „зачыненым у клетцы“ бібліятэкі. Але я адчуваю вашую прысутнасць, я — побач з вамі», — дадаў Святы Айцец.
З той нядзелі на заканчэнне малітвы пастыр паўсюднага Касцёла ішоў у свой асабісты кабінет, адкуль зазвычай праводзіцца малітва ў нядзелю апоўдні, і благаслаўляў або пустую плошчу, або некалькіх вернікаў, якія паволі вярталіся на гэтую традыцыйную сустрэчу з Папам.