Папа Францішак змяніў дату правядзення яшчэ адной значнай агульнакасцёльнай падзеі. Прычына рашэння — нявызначанасць, звязаная з эпідэміялагічнай сітуацыяй у свеце.
Як паведамляе беларуская рэдакцыя парталу Vatican News, Святы Айцец сумесна з Папскім камітэтам міжнародных эўхарыстычных кангрэсаў і з Канферэнцыяй Біскупаў Венгрыі прыняў рашэнне аб пераносе 52-а Міжнароднага эўхарыстычнага кангрэсу, запланаванага ў Будапешце ў верасні 2020 г., на верасень 2021 г. Аб гэтым заявіла 23 красавіка прэс-служба Святога Пасаду.
Эўхарыстычныя кангрэсы праходзяць раз у чатыры гады.
Яны спадарожнічаюць гісторыі Касцёла з канца ХІХ ст. Першы прайшоў у французскім горадзе Ліль у 1881 г, а апошні — з 25 па 31 студзеня 2016 г. у філіпінскім Себу. Дэвізам форуму ў Будапешце будуць словы Псальма 87: «У табе ўсе крыніцы мае».
