Ватыканскі аўтапарк папоўніўся двума новымі электракарамі «Smart». Яны былі перададзены ў бязвыплатнае карыстанне нямецкім аўтамабільным канцэрнам «Daimler AG».
Як паведамляе беларуская рэдакцыя парталу Vatican News, два новыя чатырохмесныя электрычныя аўтамабілі былі дастаўлены ў Ватыкан 24 ліпеня.
Яны будуць знаходзіцца ў распараджэнні Губернатарату і павінны яшчэ раз падкрэсліць увагу папскай дзяржавы да праблем навакольнага асяроддзя і эвалюцыю ў кірунку выкарыстання экалагічна чыстага транспарту.
Рашэнне выкарыстоўваць электрамабілі — адказ на зварот папы Францішка, які ў сваёй энцыкліцы Laudato si’ пісаў: «Тэрміновы заклік да абароны нашага супольнага дому ахоплівае клопат аб з’яднанні ўсёй чалавечай сям’і ў імкненні да ўстойлівага і інтэгральнага развіцця, бо ведаем, што ўсё можа змяніцца».
У чэрвені гэтага года на тэрыторыі Ватыкана было ўстаноўлена 20 зарадных станцый для электрамабіляў, якія маюць па два порты магутнасцю 22 кВт кожны. Электракары ёсць у распараджэнні Ватыканскай жандармерыі, Ватыканскай пошты, некаторых структур Рымскай курыі.
