Пошук


14.06.2019 15:58   Тэкст: Анастасія Грышан / Catholic.by

Фота: grodnensis.by

13 чэрвеня ў пабернардынскім касцёле Адшукання Святога Крыжа ў Гродне з удзелам арцыбіскупа Тадэвуша Кандрусевіча адбылася адпустовая ўрачыстасць у гонар св. Антонія Падуанскага. Пробашч парафіі кс. прэлат Антоні Ханька ў гэты дзень адзначыў 70-гадовы юбілей і імяніны.

Цэлебрацыю ўрачыстай святой Імшы ў чатырохсотгадовай святыні на маляўнічым узгорку над Нёманам узначаліў арцыбіскуп Тадэвуш Кандрусевіч, Мітрапаліт Мінска-Магілёўскі.

У гаміліі арцыбіскуп прадставіў асобу св. Антонія як славутага прапаведніка і апекуна ў пошуку згубленых рэчаў.

Пры гэтым іерарх падкрэсліў найбольш вострую праблему сучаснасці — страту веры, пра што сведчыць крызіс сям’і, Божага дару жыцця, маральнасці.

Чалавек, як адзначыў арцыбіскуп, трапляе ў рознага роду залежнасці: алкагольную, наркатычную, сексуальную, камп’ютарную, забаўляльную і іншыя. Ён думае, што знойдзе там шчасце, аднак такое шчасце з’яўляецца віртуальным і хутка лопаецца, як мыльная бурбалка, пакідаючы пасля сябе духоўную пустэчу і ведучы да трагедыі.

Таму, дадаў іерарх, Касцёл павінен вярнуць людзям страчаную веру, а ў гэтым працэсе асаблівая роля належыць святару. Гэта, па словах арцыбіскупа, неабходна падкрэсліць у той дзень, калі ксёндз прэлат Антоні Ханька адзначае юбілей 70-годдзя. З 70 гадоў жыцця 41 год ён правёў у святарстве.

Прыкметна, заўважыў арцыбіскуп, што гэты юбілей ксёндз прэлат святкуе ў той день, калі Касцёл адзначае свята Езуса Хрыста, Найвышэйшага і Вечнага Святара.

«Езус стаў святаром не для сябе, а для людей. Ён ахвяраваў сябе на дрэве крыжа, і гэтая ахвяра працягваецца на алтары, дзякуючы служэнню святара.

Адным з такіх святароў з’яўляецца кс. прэлат Антоні Ханька, які яшчэ ў часы ганенняў ахвяраваў сябе служэнню Богу і людзям, каб весці іх да Яго і адраджаць веру. У тыя часы ганенняў на веру рашэнне пайсці ў семінарыю было звязана з вялікімі непрыемнасцямі, але юнак Антоні Ханька свядома адказаў на заклік Хрыста да святарства», — сказаў Мітрапаліт Мінска-Магілёўскі.

«Падчас Апошняй Вячэры Езус абмыў ногі апосталам. Ксёндз прэлат Антоні Ханька 41 год абмывае сэрцы людзей ад грахоўнага бруду і ўмацоўвае іх Божай ласкай», — дадаў іерарх.

Арцыбіскуп пажадаў юбіляру Божага благаслаўлення на далейшае служэнне Касцёлу па прыкладу Найвышэйшага Святара Езуса Хрыста.

Пасля Імшы юбіляра павіншавалі таксама шматлікія вернікі.

Абноўлена 18.07.2019 13:27
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.