З 6 па 8 мая ў рэкалекцыйным доме ў Воршы адбыўся курс «Закхей» для моладзі.
Як паведаміў партал Catholicnews.by, каля 30 маладых людзей з Полацка, Наваполацка, Віцебска, Мінска і Оршы сабраліся на гэтых своеасаблівых духоўных практыкаваннях, каб паглыбіць сваю веру.
Кульмінацыяй кожнага дня была Эўхарыстыя, падчас якой удзельнікі курсу духоўна насычаліся Божым Словам і Целам Хрыста.
З дапамогай а. Аляксандра Жарнасека МІС яны таксама паглыблялі свае рэлігійныя веды, задавалі святару хвалюючыя пытанні і разважалі над сваім штодзённым жыццём.
Тэмы духоўных настаўленняў былі актуальныя і цікавыя. Глыбей паразважаць над імі ў прысутнасці Езуса была магчымасць падчас адарацыі Найсвяцейшага Сакрамэнту.
Споведзь і заступніцкая малітва сталі момантам шчырасці і перамены жыцця з дапамогаю моцы Божай.
Вольны час быў запоўнены гульнямі, спевамі і сяброўскімі размовамі.
По словах маладых удзельнікаў, курс «Закхей» стаў для іх добрай нагодай затрымацца, падумаць над сваім жыццём і надаць яму адпаведны кірунак, а таксама знайсці новых сяброў: аднадумцаў і адзінаверцаў.
