Пошук


07.05.2019 14:35   Тэкст: Kс. Юрый Марціновіч / Grodnensis.by / Catholic.by

6 мая пры парафіі cв. Тэрэзы Авільскай у Шчучыне распачаліся Дні моладзі Гродзенскай дыяцэзіі.

Як паведамляе партал Grodnensis.by, у сустрэчы ўдзельнічае больш за 1000 чалавек з розных парафій Гродзеншчыны, а таксама прадстаўнікі Мінска-Магілёўскай архідыяцэзіі. Маладым людзям спадарожнічаюць іх душпастыры, сёстры законныя і катэхеты, якія разам з імі правядуць гэтыя некалькі дзён.

Сёлета Дыяцэзіяльныя дні моладзі адбываюцца ўжо ў 26-ы раз.

Сустрэча ў Шчучыне праходзіць пад дэвізамі «Па прыкладу Марыі буду служыць Пану».

Гэтыя словы працягваюць тэму Сусветных дзён моладзі, якія ў студзені прайшлі ў Панаме пад дэвізам «Вось я, слуга Пана, няхай мне станецца паводле твайго слова» (Лк 1, 38). Юнакі і дзяўчаты углядаюцца ў прыклад Марыі, якая аб’яўляецца як пакорная слуга Пана, што дасканала рэалізуе план, падрыхтаваны для Яе Богам.

Мэта арганізатараў мерапрыемства — дапамагчы маладым людзям усвядоміць, што служэнне не азначае прыгнечанасці, знявольвання ці абмежавання свабоды, а з’яўляецца выкананнннем Божай волі, што дае сапраўднае шчасце.

Як адзначае душпастыр моладзі Гродзенскай дыяцэзіі і арганізатар сустрэчы кс. канонік Антоні Грэмза, «хрысціянін у поўнай меры рэалізуе сваё жыццё толькі тады, калі па прыкладзе Марыі навучыцца служыць Пану Богу і іншым людзям».

«Марыя паказвае нам, што варта служыць. Паказвае, што з гэтага служэнне належыць чэрпаць радасць і сілы. Да служэння быў пакліканы кожны чалавек», — дадае святар.

Цэлебрацыю Эўхарыстыі на распачацце Дыяцэзіяльных дзён моладзі ўзначалiў дапаможны біскуп Гродзенскай дыяцэзіі Юзаф Станеўскі, адказны ў епіскапаце Беларусі за душпастырства моладзі.

Звяртаючыся да ўдзельнікаў сустрэчы, біскуп Станеўскі падкрэсліў, што Езус – найлепшы ўзор маладосці. Таму, дадаў іерарх, вельмі важна ўглядацца ў маладога Езуса, якога паказвае Евангелле, бо ў Ім можна распазнаць шмат прыкмет, характэрных для маладых сэрцаў.

«Зрабіце Касцёл маладым і навучыцеся слухаць», — заклікаў біскуп прысутную моладзь, дадаючы, што Касцёл павінен быць маладым і для маладых. Паволе іерарха, маладыя людзі могуць дапамагчы Касцёлу заставацца маладым, не псавацца, не замыкацца і быць здольным да сведчання.

На заканчэнне Імшы ўдзельнікі сустрэчы падарылі біскупу цішотку (майку) з лагатыпам сёлетніх Дзён моладзі.

Завяршыўся першы дзень сустрэчы духоўнай канферэнцыяй «Роля служэння ў жыцці хрысціяніна», якую прамовіў удзельнікам а. Юрый Находка OCD, і канцэртам моладзевага гуртa «Пілігрымы» са Смаргоні.

Не зважаючы на халоднае надвор’е і зусім не майскую імжу, удзельнікі супольна славілі Бога праз спеў, танец і шчырую радасць. Пасля канцэрту юнакі і дзяўчаты атрымалі благаслаўленне і разышліся па дамах, дзе іх прымаюць на начлег гасцінныя жыхары Шчучына.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.