7 лютага біскуп Гродзенскі Аляксандр Кашкевіч благаславіў будоўлю будучага генеральнага консульства Літвы ў Гродне. Новае консульства будзе ўзведзена ў цэнтры горада на вул. Васілька.
Як паведамляе партал Гродзенскай дыяцэзіі Grodnensis.by, на ўрачыстасці сабраліся госці, запрошаныя літоўскім бокам. Прысутнічалі Надзвычайны і паўнамоцны пасол Літоўскай Рэспублікі ў РБ Андрус Пулокас, Генеральны консул Літвы ў Гродне Генадзіюс Мяцкаліс, прадстаўнікі мясцовай улады.
Таксама былі прысутныя вернікі літоўскай каталіцкай супольнасці Гродна, для якіх кожную нядзелю ў катэдральным касцёле св. Францішка Ксаверыя пробашч кс. канонік Ян Кучынскі цэлебруе Імшу на літоўскай мове.
У гэты дзень у аснову будучага консульства была закладзена капсула са зваротам да нашчадкаў.
У звароце адзначаецца:
«Тыя, хто сустракаецца тут, будуць умацоўваць традыцыі нашых народаў і ствараць добрасуседскія адносіны паміж Літвой і Беларуссю».
Будаўніцтва консульства ў горадзе на Нёмане пачалося ў кастрычніку мінулага года. Дыпламатычная місія суседняй краіны плануе ўзвесці тут два будынкі: у адным размесціцца непасрэдна само консульства, а ў другім будзе знаходзіцца жылы блок з канферэнц-залай.
Новы будынак злучыць як рысы сучаснай архітэктуры, так і нацыянальныя матывы, характэрныя для літоўскага будаўніцтва.
У ім будуць выкарыстаны таксама элементы, якія імітуюць даўніну. Завяршыць будаўніцтва плануецца да лютага 2020 г.
