19 снежня ў другой палове дня адбылася аплаткавая сустрэча супрацоўнікаў Курыі Мінска-Магілёўскай архідыяцэзіі.
Такія сустрэчы сталі ўжо добрай традыцыяй і штогод адбываюцца перад святамі Божага Нараджэння. Яны з’яўляюцца добрай нагодай пабыць разам у нефармальных абставінах і без цяжару штодзённых клопатаў.
У прамове да сваіх найбліжэйшых супрацоўнікаў арцыбіскуп Тадэвуш Кандрусевіч, Мітрапаліт Мінска-Магілёўскі, падзякаваў ім за ахвярнае служэнне ў выкананні задач, якія стаяць перад Мінска-Магілёўскім Касцёлам, і пажадаў благаслаўлення на святы Божага Нараджэння і на надыходзячы Новы год.
«Езус нараджаецца сёння на нашай зямлі дзякуючы служэнню Касцёла, якое цесна звязана са служэннем Курыі як яго кіруючага органа», — падкрэсліў іерарх.
Ён таксама выказаў надзею на тое, што далейшае служэнне Курыі будзе спрыяць вырашэнню надзённых праблем з мэтай духоўнага ўдасканалення чалавека праз прыйсце ў яго душу Езуса сваёй ласкай.
Удзельнікі сустрэчы падзяліліся адзін з адным аплаткай і павіншавалі з надыходзячымі святамі.
