У кнізе распавядаецца пра драматычны лёс касцёла ў Варапаеве — не толькі самога будынка, але і парафіі. У выданні прыводзяцца спісы будаўнікоў касцёла, а таксама пералік святароў, якія выйшлі з парафіі.
Асобныя раздзелы кнігі прысвечаны святарам, якія тут працавалі, сёстрам законным, будаўнікам, дзякуючы якім паўстаў сучасны будынак храма; спонсарам і шэфам, што дапамагалі ў будаўніцтве; моладзі парафіі.
Прэзентацыя кнігі адбылася 15 верасня. З гэтай нагоды ў святыні сабраліся пробашч кс. Ежы Вільк, сябры касцёльнага камітэту, а таксама тыя людзі, што будавалі гэту святыню.
Сустрэча распачалася супольнай малітвай у касцёле, а потым працягнулася на плябаніі. Аліна Латыш, аўтарка кнігі, расказала пра змест выдання, паказала фотаздымкі, якія змешчаныя ў кнізе, зачытала імёны і аповеды будаўнікоў, якія ўжо адышлі ў вечнасць.
«У будаўніцтве касцёла ўдзельнічалі шмат маіх знаёмых, родных, мой тата, тры цёці і наогул вельмі шмат добрых, сціплых вернікаў, — адзначае аўтарка кнігі Аліна Латыш. — Калі мы пра гэта не будзем памятаць, то мы застанёмся беспамятнымі манкуртамі і нам, нашым дзецям і ўнукам, не будзе каму падзякаваць за адраджэнне веры».
Пасля кожны з удзельнікаў сустрэчы падзяліўся сваімі ўспамінамі пра ўзвядзенне храма, пра цяжкасці і радасці, якія гэтаму спадарожнічалі. На парафіяльным фэсце ў гонар святога Міхала, які адбыўся 29 верасня, кожны ахвотны мог набыць кнігу.
