14 жніўня ў будынку Канферэнцыі Каталіцкіх Біскупаў у Беларусі ў Мінску адбыўся другі тур уступнага экзамена для кандыдатаў на першы год навучання ў Вышэйшых духоўных семінарыях у Гродне і ў Пінску.
Паведамленне
пра вынікі другога туру ўступнага экзамена ў Вышэйшыя духоўныя семінарыі ў Гродне і Пінску
Экзаменацыйныя пытанні датычыліся Катэхізісa Каталіцкага Касцёла, жыцця Паўсюднага і лакальнага Касцёла, яго структуры з мэтай лепш ацаніць зацікаўленасць кандыдатаў тым, як жыве Касцёл. Акрамя таго, кандыдатам трэба было растлумачыць матывы свайго выбару следаваць за Хрыстом, які кліча іх да працы ў Хрыстовай аўчарні ў якасці святароў.
Экзамен прымала экзаменацыйная камісія ў складзе:
- біскуп Аляксандр Яшэўскі SDB, старшыня камісіі па справах фармацыі семінарыстаў і святароў пры Канферэнцыі Каталіцкіх Біскупаў у Беларусі — cтаршыня камісіі;
- ксёндз Андрэй Рылка, рэктар Вышэйшай духоўнай семінарыі ў Пінску;
- ксёндз Павел Эйсмант, куратар 1-га курса і прадстаўнік Гродзенскай дыяцэзіі; ксёндз Алег Пятрашка, духоўны айцец 1-га курса.
Пасля пісьмовай часткі экзамена кандыдаты сустрэліся з адным з членаў камісіі на кваліфікацыйнай размове.
Экзаменацыйная камісія, праінфармаваўшы пра сваё рашэнне кожнага дыяцэзіяльнага біскупа, з чыіх дыяцэзій паходзяць кандыдаты, і атрымаўшы іхняе благаслаўленне і згоду, паведамляе, што новымі навучэнцамі семінарыі ў Гродне сталі:
Гродзенская дыяцэзія:
Яраслаў Казлоўскі (парафія Святога Юзафа, Гродна)
Мінска-Магілёўская архідыяцэзія:
Аляксандр Нікіценка (парафія Маці Божай Ружанцовай, Ракаў)
Новым навучэнцам семінарыі ў Пінску стаў:
Павел Валуеў (парафія Маці Божай Фацімскай, Баранавічы).
Такім чынам, разам з семінарыстамі, залічанымі ў першым туры экзаменаў, агульная колькасць студэнтаў першага курса духоўных семінарый у Гродне і Пінску склала 10.
Просім усіх людзей добрай волі падтрымаць новых семінарыстаў сваёй малітвай, а таксама няспынна маліцца ў інтэнцыі новых і святых пакліканняў да святарства.
