Хлопцы і дзяўчаты з 30 парафій розных дыяцэзій Беларусі сталі ўдзельнікамі юбілейнай Х Парафіяды дзяцей і моладзі Гродзенскай дыяцэзіі, якая з 18 па 21 чэрвеня праходзіць у Гродне.
Упершыню ўдзельнікам Парафіяды стала парафія св. Яна Хрысціцеля ў Валкалаце (Віцебская дыяцэзія).
Моладзевы форум складаўся са своеасаблівай трыяды: святыня, тэатр, спорт. Юнакі і дзяўчаты змагаліся за права звацца лепшымі ў спартыўных спаборніцтвах па футболе, валейболе, настольным тэнісе, у бадмінтоне, кіданні мяча, бегу, скачках у даўжыню з разбегу, а таксама шашках, біблійным конкурсе, конкурсе малюнкаў і конкурсе рэлігійнай песні.
Ганаровым госцем Парафіяды была віцэ-старшыня Парафіяды св. Юзафа Каласанса ў Варшаве Марыя Куель.
Як адзначылі арганізатары, Каталіцкі Касцёл прыкладае шмат намаганняў, каб выхоўваць маладое пакаленне ў культуры слова і ўчынку. Якраз з гэтай мэтай і арганізоўваюцца Парафіяды, якія, сярод іншага, вучаць удзельнікаў культуры слова, вучаць ствараць культуру быцця.
