Пошук
04.06.2018 08:59   Ілья Лапато / Януш Чарнамораў / Фота: Ілля Ваніслаўчык / Catholic.by

2 чэрвеня сакрамэнт пасвячэння ў ступені прэзбітэрату з рук біскупа Пінскага Антонія Дзям’янкі прынялі дыяканы Эдуард Мажаеў і Павел Мазан.

Урачыстасць адбылася ў катэдральным касцёле Унебаўзяцця Найсвяцейшай Панны Марыі.

Ксёндз Эдуард Мажаеў паходзіць з Віцебска і з’яўляецца выпускніком Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску, ксёндз Павел Мазан паходзіць з Мастоў і святарскую фармацыю атрымаў у Вышэйшай духоўнай семінарыі ў Гродне.

«Я адкрыты да тых заданняў, якія вызначаць ардынарый і Касцёл»

Ксёндз Эдуард Мажаеў: «Прэзбітэрскае пасвячэнне — тое, да чаго я імкнуўся і рыхтаваўся. Я назваў бы гэтае чаканне спаўненнем у шырокім сэнсе.

Я адкрыты на паглыбленне ведаў і гатовы прыкладаць усе свае магчымасці да выканання тых заданняў, якія вызначыць мне ардынарый і Божы Касцёл.

Семінарыйнае выхаванне фармуе чалавека. Да гэтага можна дадаць сталенне і ачышчэнне ад ідэалізацыі зямнога. Праз гэта больш адкрываешся на Божы план наконт сябе. У маім выпадку гэта навука любові праз адкрыццё прабачэння: калі бачыш жыццё больш праўдзіва і больш чалавечна».

«Пастараюся быць добрым інструментам у руках Божых»

Ксёндз Павел Мазан: «Я не перажываю за будучыню, бо давяраюся Богу. Той, хто стварыў мяне і паклікаў, будзе і далей весці мяне сваімі сцежкамі.

За час семінарыйнай фармацыі досвед веры, яе перажыванне, успрыманне клопатаў і турботаў у мяне выйшлі на новы ўзровень. Я лепей пазнаю іншых людзей, Бога і самога сябе.

Святарства для мяне — вялікая адказнасць, вялікі і незаслужаны дар ад Бога. Прысвячэнне жыцця на службу Богу і людзям.

Сказаўшы аднойчы Богу „так“, я павінен буду кожны дзень пацвярджаць гэтае абяцанне. Пастараюся быць добрым інструментам у руках Божых, выконваючы Яго волю».

Заданне святара — даваць сведчанне

 

Урачыстая св. Імша, падчас якой было ўдзелена прэзбітэрскае пасвячэнне, сабрала вялікую колькасць вернікаў.

У ёй бралі ўдзел выкладчыкі і семінарысты Вышэйшай духоўнай семінарыі імя св. Тамаша Аквінскага ў Пінску, святары з розных парафій Пінскай дыяцэзіі, а таксама святары з Гродзенскай і Віцебскай дыяцэзій, у тым ліку пробашчы родных парафій новапрэзбітэраў.

Пастыр Пінскай дыяцэзіі, звяртаючыся да прысутных, падкрэсліў важнасць і неабходнасць святарскага служэння ў Касцёле.

«Заданне святара ў наш час — даваць такое сведчанне, каб людзі бачылі плады ласкі ў яго жыцці і паверылі ў Хрыста. Даваць сведчанне любові да чалавека па прыкладу Хрыста. Сведчанне любові, здольнай на самаахвяраванне», — падкрэсліў біскуп Антоні.

Пастыр падзякаваў бацькам новапрэзбітэраў, выказаў словы падзякі святарам, якія адказвалі за іх святарскую фармацыю, і па-бацькоўску даў змястоўныя парады на пачатак святарскага служэння.

Напрыканцы св. Імшы новапрэзбітэры шчыра падзякавалі біскупу Пінскай дыяцэзіі за прыклад добрага і мудрага пастыра. Былі выказаны словы шчырай падзякі былому рэктару семінарыі ў Пінску кс. Яну Саламону, а ў асобе цяперашняга віцэ-рэктара гэтай вышэйшай духоўнай навучальнай установы кс. Адама Дынака — таксама ўсім фарматарам і выкладчыкам.

Абноўлена 19.06.2018 14:10
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа