Кангрэгацыя сясцёр місіянерак Святой Сям’і са смуткам паведамляе, што 19 красавіка 2018 г. адышла ў вечнасць сястра Сільвія Міраслава Жычка ад Святога Духа, пражыўшы 60 гадоў, з якіх 40 — у Кангрэгацыі.
Беларускія вернікі памятаюць сястру Сільвію як таленавітую арганістку, якая працяглы час праслаўляла Пана граннем і спевам у пінскім катэдральным касцёле Унебаўзяцця Найсвяцейшай Панны Марыі.
Развітанне з с. Сільвіяй распачнецца ў доме Кангрэгацыі сясцёр місіянерак Святой Сям’і на вуліцы Зельнай у Беластоку ў панядзелак 23 красавіка а 8-й гадзіне.
Пахавальная св. Імша адбудзецца ў капліцы законнага дома а 11-й гадзіне, пасля якой цела спачылай будзе пахавана на фарных могілках у Беластоку.
Вечны адпачынак дай ёй, Пане.
