Днямі быў прэзентаваны лагатып агульнабеларускай сустрэчы каталіцкай моладзі, якая пройдзе ў Гродне з 29 красавіка па 1 мая. Пра гэта паведамляе grodnensis.by.
На лагатыпе прадстаўлены крыж, сэрца і выява Маці Божай, а таксама напісана тэма сустрэчы: «Не бойся, Марыя, бо знайшла ты ласку ў Пана» (Лк 1, 30).
Aгульнабеларуская сустрэча моладзі будзе прымеркавана да Года моладзі ў Каталіцкім Касцёле на Беларусі i спалучана з юбілейнымі 25-мі Дыяцэзіяльнымі днямі моладзі Гродзенскай дыяцэзіі.
Ксёндз канонік Антоні Грэмза, душпастыр моладзі Гродзенскай дыяцэзіі, ужо сёння заклікае моладзь з усёй краіны да ўдзелу ў гэтай сустрэчы.
«Гэта будзе наша сумеснае свята маладосці і сведчання пра тое, што ў Беларусі ёсць шмат адданай Пану Езусу і Панне Марыі моладзі, якая шчырым сэрцам жадае верыць Богу і сустракацца разам», — адзначае святар.
У бліжэйшы час будзе абвешчана праграма сустрэчы і ўмовы ўдзелу ў ёй.
