20 снежня пры касцёле Св. Міхала Арханёла ў Навагрудку адбылася дыскусійная сустрэча вернікаў навагрудскай парафіі, прысвечаная разважанню на тэму «Эўхарыстыя ў жыцці верніка». Ініцыятарам правядзення дыскусійнага стала выступіла рэдакцыя часопіса «Дыялог» на чале з бр. Корнэлем Консэкам.
У сустрэчы прыняло ўдзел 10 чалавек, якія дзяліліся сведчаннем, чым асабіста для іх з’яўляецца ўдзел у Эўхарыстыі і як яны перажываюць святую Імшу.
Вядучы дыскусійнага стала кс. Юрый Жэгарын згодна з думкай рэдакцыі часопіса «Дыялог» зрабіў асаблівы акцэнт на сімволіку літургіі святой Імшы – на літургічныя жэсты (знак крыжа, пастава стаяння, сядзення, кленчання), а таксама значэнне словаў. Шмат увагі ў дыскусіі было прысвечана належнай падрыхтоўцы верніка да поўнага перажывання літургіі Найсвяцейшай Ахвяры.
У найбліжэйшым нумары часопіса «Дыялог» з’явіцца поўны артыкул-справаздача з вынікам працы дыскусійнай сустрэчы вернікаў у Навагрудку.
