20 снежня ў парафіі Унебаўзяцця Найвяцейшай Панны Марыі і св. Станіслава ў Магілёве прайшла аплатковая сустрэча з з членамі Жывога Ружанца, Легіёну Марыі і супрацоўнікамі «Карытас». Імшу ўзначаліў дапаможны біскуп Мінска-Магілёўскай архідыяцэзіі Аляксандр Яшэўскі SDB.
«10 гадоў таму Мітрапаліт Тадэвуш Кандрусевіч распачаў сваю дзейнасць на нашай беларускай зямлі і ўвёў у Мінска-Магілёўскай архідыяцэзіі прыгожую традыцыю — аплаткавую сустрэчу біскупа перад святам Божага Нараджэння з касцёльнымі супольнасцямі, рухамі і іншымі групамі. Пасля двух гадоў прабывання тут, на магілёўскай зямлі, я маю жаданне, каб у магілёўскай частцы нашай архідыяцэзіі гэтая традыцыя таксама развівалася», — заўважыў біскуп Аляксандр Яшэўскі.
У гаміліі іерарх, разважаючы над Евангеллем і сцэнай Звеставання, сказаў: «Як жа нам, людзям, цяжка ў сваім жыцці падпарадкаваць сваю ўласную волю волі іншага чалавека: цяжка мужу падпарадкаваць сваю волю волі жонкі і наадварот; як цяжка нам бывае на працы падпарадкоўвацца кіраўніку, гэта вельмі нялёгка, вельмі часта нам прыходзіцца нават ісці на кампраміс, прамаўчаць. Але яшчэ цяжэй убачыць і адкрыць для сябе тую волю, якую Бог мае для кожнага з нас і жадае, каб мы здзяйснялі яе ў сваім жыцці».
Што такое для нас выканаць Божую волю? Як разумець рэлігійнае вымярэнне выкананне волі Айца? Такія пытанні ўзняў у сваёй прамове біскуп, адказны за Магілёўскі рэгіён.
«У першую чаргу гэта наш абавязак, абавязак як сапраўдных дзяцей Божых, выканаць волю Нябеснага Айца ў нашым з вамі жыцці. Па-другое, неабходна прыняць самім свабодна тое, што Бог жадае для нас. І дапамогай у разуменні гэтага абавязку, а таксама прыняцця яго ў поўнай свабодзе, з’яўляецца сённяшняя сцэна Звеставання, а менавіта асоба Найсвяцейшай Панны Марыі», — нагадаў іерарх.
Біскуп Аляксандр Яшэўскі падкрэсліў, што Марыя «абавязак выканаць волю Бога робіць сваёй уласнасцю, прымае ў поўнай свабодзе і радасці, таму здольная сказаць: “Вось я, слуга Пана, няхай мне станецца паводле Твайго слова”».
Біскуп таксама падкрэсліў, што вялікія справы здяйсняюцца ў цішыні, у малітоўным чуванні, на каленях. «Таму, дарагія члены Жывога Ружанца, працягвайце вашу нястомную малітву ў інтэнцыях, якія Святы Айцец дае на кожны месяц, а таксама ў інтэнцыі свету, Касцёла, асабліва нашай магілёўскай зямлі», — заклікаў іерарх.
Біскуп Аляксандр Яшэўскі ўзгадаў таксама пра сутнасць дзейнасці Легіёну Марыі і дабрачыннага таварыства «Карытас», дзе людзі праз служэнне іншаму чалавеку жадаюць прынесці Езуса ў канкрэтнай матэрыяльнай дапамозе. Прыгожай, па словах іерарха, з’яўляецца традыцыя ў магілёўскіх парафіях, калі члены Легіёну Марыі дапамагаюць святарам у першую пятніцу месяца наведваць хворых людзей, тых, хто не можа самастойна прыйсці ў святыню, каб сустрэцца з Богам, прыняць Яго ў Найсвяцейшым Сакрамэнце. Важнай з'яўляецца дзейнасць «Карытас», мэта якой — дапамога патрабуючым, незалежна ад іх веравызнання, а такіх, патрабуючых людзей, вельмі шмат. Такая дзейнасць немагчыма без дапамогі валанцёраў, для якіх біскуп таксама прасіў Божага благаслаўлення, каб іх праца прыносіла добры плён.
«Нам трэба навучыцца за ўсё быць удзячнымі Пану Богу, нястомна звяртаючыся да Марыі, каб паўтараць нашае “так” у выкананні Божай волі. Неабходна вучыцца падпарадкаваць сваю волю волі Бога і прасіць святла Духа Святога, каб бачыць волю Божую адносна нас на гэтай зямлі, праслаўляючы Яго, як гэта рабіла Марыя», — заключыў дапаможны біскуп Мінска-Магілёўскай архідыяцэзіі.
