19 снежня падчас каляднай прэс-канферэнцыі Мітрапаліт Мінска-Магілёўскі арцыбіскуп Тадэвуш Кандрусевіч, адказваючы на пытанні журналістаў, выказаў сваю думку наконт магчымага стварэння ў Беларусі Рады хрысціянскіх канфесій.
Паводле слоў іерарха, падобныя Рады сапраўды ўжо дзейнічаюць у Расіі і ва Украіне.
«У Расіі гэта Хрысціянскі міжканфесійны кансультатыўны камітэт (ХМКК), створаны ў 1993 годзе, — адзначыў арцыбіскуп. — Калісьці разам з сённяшнім Патрыярхам Кірылам і прадстаўніком баптыстаў я быў адным з сустаршыняў гэтага Камітэту, у пасяджэннях якога, як правіла, прымаюць удзел і прадстаўнікі з краін былога Савецкага Саюза».
Мітрапаліт Кандрусевіч дадаў, што падобныя аб’яднанні носяць нефармальны характар.
«Гэта нефармальныя рады. Яны не зарэгістраваныя і не маюць юрыдычнага статусу. Аднак яны збіраюцца, каб выказаць сваё меркаванне па тых ці іншых праблемах грамадства. Я — за тое, каб такая Рада існавала і ў нас».
На думку іерарха, адным з пунктаў для абмеркавання такой Радай магло б стаць пытанне беларускай біблійнай тэрміналогіі.
«Кожная канфесія карыстаецца сёння сваім перакладам і тэрміналогіяй, прынятымі ў Касцёле і Царкве, але было б добра, каб была і “агульная” тэрміналогія. Гэта важна, бо пакуль у нас няма сталай навуковай тэрміналогіі. У гэтым плане было б добра працаваць разам», — заключыў іерарх.
Мітрапаліт дадаў, што ў Беларусі падобная міжканфесійная рада ўжо дзейнічае пры Упаўнаважаным па справах рэлігій і нацыянальнасцяў.
«Наколькі я ведаю, у Расіі і ва Украіне такія Рады дзейнічаюць без удзелу дзяржавы. Магчыма, ёсць сэнс пераняць такі ж вопыт і Беларусі».
