У бабруйскім касцёле 8 снежня адбылася святая Імша з нагоды ўрачыстасці Беззаганнага Зачацця Найсвяцейшай Панны Марыі. Гэтае свята для вернікаў асаблівае тым, што з'яўляецца адпустовым.
Так адбылося, што гэты дзень супаў з пачаткам рэкалекцый. На ўрачыстую Імшу быў запрошаны біскуп вікарый для Магілёва і Магілёўскай вобласці Аляксандр Яшэўскі SDB, яму і выпаў гонар праводзіць службу. У Эўхарыстыі ўдзельнічалі дыякан Мікалай Гракаў, які не так даўно нёс служэнне пры парафіі Беззаганнага Зачацця Найсвяцейшай Панны Марыі ў Бабруйску, і ксёндз рэкалекцыяніст Дзмітрый Занямонскі з Мінска.
Падчас рэкалекцыйных разважанняў аб Найсвяцейшай Панне Марыі былі зададзены наступныя пытанні: «Хто для мяне Дзева Марыя?» і «Што я магу зрабіць для Яе?»
На гэтыя ж пытанні зрабіў акцэнт і біскуп Аляксандр Яшэўскі, адзначыўшы, што лепшае, што мы можам зрабіць для нашай Нябеснай Маці, — гэта старацца стаць такімі ж святымі, як і Яе Беззаганнае Сэрца.
