Пошук


27.11.2017 11:14   Кс. Міхал Бубен / Фота: Эдгар Путырскі, Алена Шаліма / Catholic.by

25 лістапада ў Нацыянальным санктуарыі Маці Божай у Будславе ўшанавалі святую Кацярыну Александрыйскую — апякунку чыгуначнікаў.

Ва ўрачыстасці прынялі ўдзел чыгуначнікі з душпастырства Мінска-Магілёўскай архідыяцэзіі, сёстры з супольнасці св. Кацярыны Александрыйскай, якія нясуць служэнне на Гродзеншчыне, а таксама чыгуначнікі з Гродзенскай і Віцебскай абласцей.

Святкаванне распачалося адарацыяй Найсвяцейшага Сакрамэнту і ружанцовай малітвай у інтэнцыі чыгуначнікаў і іх сем’яў, пасля чаго сёстры правялі прэзентацыю біяграфіі святой Кацярыны.

 

У 12.00 ва ўрачыстай працэсіі ў святыню былі ўнесены рэліквіі св. Кацярыны, пасля чаго распачалася святая Імша, якую ўзначаліў дапаможны біскуп Мінска-Магілёўскай архідыяцэзіі Юрый Касабуцкі.

У гаміліі іерарх параўнаў духоўнае жыццё з працай чыгункі: «Сядаючы ў цягнік, мы едзем да патрэбнай нам станцыі, але, каб цягнік шчасліва даехаў, неабходная праца шматлікіх людзей, якіх мы не бачым і пра якіх нават не здагадваемся: дыспечар руху, пуцейцы і ўсе, хто пільнуе, каб нашае падарожжа было шчаслівым. Таксама і ў духоўным жыцці: каб атрымаць збаўленне, трэба жыць Божым словам і сакрамэнтамі. Дапамагаюць нам у жыццёвым падарожжы прыклады святых, якія ўжо “прыехалі на мэтавую станцыю”».

Біскуп таксама распавёў аб тым, як важна ўшаноўваць рэліквіі святых і якую ролю яны займаюць у жыцці вернікаў.

Падчас святой Імшы ў працэсіі з дарамі чыгуначнікі ахвяравалі абраз св. Кацярыны, які напісала мастачка з Маладзечна Ядвіга Сянько. Пасля Эўхарыстыі абраз быў благаслаўлены біскупам.

Абноўлена 30.11.2017 15:26
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.