26 верасня парафіяне касцёла Унебаўзяцця Найсвяцейшай Панны Марыі ў Адамавічах сталі сведкамі гістарычнай падзеі — каранацыі абраза Маці Божай. Ва ўсе часы каранацыя абразоў Маці Божай з'яўлялася найвышэйшым і найбольш урачыстым актам прызнання выключнага культу, якім вернікі акружаюць марыйныя выявы. Каранацыя ў Адамавічах стала афіцыйным пацвярджэннем касцёльнымі ўладамі таго, што перад гэтым канкрэтным абразом людзі на працягу стагоддзяў выпрошваюць шматлікія ласкі і цуды.
«Гэта здарылася! Маці Божая Адамавіцкая афіцыйна ўкаранавана!» — з радасцю ўсклікалі жыхары вёскі Адамавічы Гродзенскага раёна (Гродзенская дыяцэзія, Сапоцкінскі дэканат), што ўдзельнічалі 26 верасня ва ўрачыстасці, прысвечанай гэтай цудоўнай падзеі. Словы са спеву Magnificat «Велічае душа мая Пана, і ўзрадаваўся дух мой у Богу, маім Збаўцы...» (Лк 1, 46-47) найбольш поўна перадавалі пачуцці сведак, на вачах якіх адбывалася ўшанаванне абраза Маці Божай Адамавіцкай.
Ускладанне карон на галовы Маці Божай Адамавіцкай і Дзіцятка Езус адбылося падчас гістарычнай і надзвычай кранальнай святой Імшы, якую ўзначаліў біскуп Юрый Касабуцкі, дапаможны біскуп Мінска-Магілёўскай архідыяцэзіі, Генеральны вікарый. Разам з ім каля алтара маліліся пробашч парафіі ксёндз Аляксандр Шэмет, святары і шматлікія вернікі, якія сабраліся ў старажытным касцёле, каб стаць сведкамі ўскладання карон на галовы Марыі і Дзіцятка Езуса.
Ускладанне карон на галовы Марыі і Дзіцятка Езуса мае глыбокае тэалагічнае, духоўнае і гістарычнае значэнне.
Карона адлюстроўвае праўду веры аб тым, што Маці Божая валодае каралеўскай годнасцю як Маці Хрыста Валадара і Каралева Сусвету.
Сам абрад не надае Марыі боскіх рыс, а з'яўляецца выказваннем праслаўлення Бога за тое, якімі вялікімі ласкамі Ён адарыў чалавека. Каранацыя — гэта публічны вотум удзячнасці мясцовай супольнасці або ўсяго народа за атрыманыя аздараўленні, апеку і выслуханыя малітвы.
Абраз Найсвяцейшай Панны Марыі Адамавіцкай прадстаўляе выяву Маці Божай з Немаўляткам Езусам, тыповы для хрысціянскай іканаграфіі, дзе Марыя адлюстроўваецца як Каралева Неба і Зямлі. Цэнтральнай постаццю з'яўляецца Багародзіца, якая сядзіць на аблоках і трымае Немаўля Езуса на левым плячы. Над галовамі Марыі і Езуса бачная вялікая каралеўская карона. Яе падтрымліваюць два анёлкі, якія ўзносяцца ў паветры, што сімвалізуе акт каранацыі Маці Божай на Каралеву. Карона падкрэслівае яе годнасць і ролю ў рэалізацыі збаўчых планаў.
Абраз Маці Божай з Дзіцяткам Езусам з касцёла ў Адамавічах — гэта не проста каштоўны помнік даўніны, але перш за ўсё сэрца тутэйшай парафіі.
Ад яго сыходзіць выключнае, цёплае і вельмі блізкае чалавеку пасланне. Калі пераступаеш парог касцёла ў Адамавічах і глядзіш на абраз Найсвяцейшай Панны Марыі Унебаўзятай, час перастае ісці па прамой лініі. Тут мінулае сустракаецца з сучаснасцю ў водары воску і прахалодзе муроў, якія бачылі больш, чым здольныя змясціць чалавечыя хронікі. Менавіта тут, на стыку культур і канфесій, вера гартавалася як сталь у агні гістарычных бур.
Даведка
Традыцыя аздаблення каштоўнымі каронамі асабліва шанаваных і ўслаўленых шматлікімі ласкамі святых выяваў вядомая з пачатку XVI стагоддзя. Апостальская Сталіца пакідае права гэтай прывілеі выключна Папу. Калі на іконе Маці Божая прадстаўлена з Дзіцяткам Езусам, тады карануюцца абедзве постаці.
Першым на нашых землях цудадзейным абразом Маці Божай, каранаваным папскімі каронамі, стала ікона Маці Божай Жыровіцкай (1730 г.). У XVIII стагоддзі адбылася каранацыя цудатворнай іконы Маці Божай Бялыніцкай (1761 г.).
Аднак большасць каранацый абразоў Багародзіцы ў нашай краіне адбылася ўжо ў наш час. У 1996 годзе ў Брэсце кардынал Казімір Свёнтэк па даручэнні папы Яна Паўла ІІ усклаў кароны на цудадзейны абраз Маці Божай Берасцейскай. Менавіта ён каранаваў ад імя Папы найбольш святых выяваў Найсвяцейшай Панны Марыі на тэрыторыі нашай краіны: Маці Божай Лагішынскай (1997), Маці Божай Будслаўскай (1998), Маці Божай Кангрэгацкай у Гродне (2005), абраз Імя Марыі Беззаганна Зачатай у мінскай катэдры (2005), Маці Божай Шкаплернай у Гудагаі (2007) і Маці Божай Тракельскай (2009). 22 жніўня 2009 года арцыбіскуп Кёльнскі кардынал Ёахім Майснер усклаў папскія кароны на абраз Маці Божай Браслаўскай, Валадаркі азёраў. Такім чынам, да 26 верасня было ўсяго дзесяць каранаваных папскімі каронамі марыйных абразоў на тэрыторыі Беларусі, а пасля гэтай даты мы ўжо маем адзінаццаты.
Ад імя ўсіх парафіян і жыхароў Адамавіч
Ад дня 26 верасня Адамавіцкая Панна ззяе ў поўным бляску як Каралева нашых сэрцаў, сем'яў і ўсёй парафіі! Парафіяне адамавіцкага касцёла дзякуюць Богу за дар гэтай урачыстасці, за спрыяльнае надвор'е і за неверагодны час адзінства, які яны перажылі разам.
«Гэта быў не канец, а прыгожы пачатак. Кароны на галаве Марыі, — дзяліліся паміж сабой жыхары Адамавіч, — гэта для нас абавязак штодня жыць паводле Яе падказак і з даверам давяраць Ёй свае клопаты».
Шчырая падзяка ад парафіян і жыхароў адрасавана біскупу Юрыю Касабуцкаму — за ўзначальванне выключнай літургіі, прамоўленае слова і ўскладанне карон, а таксама святарам і ўсім, хто ўдзельнічаў у літургіі, — за прыгожае, поўнае засяроджанасці аздабленне алтара. Асаблівыя словы падзякі выказваюцца ўсім парафіянам і гасцям — за шматлікую прысутнасць, супольную малітву і кожнае сэрца, уключанае ў падрыхтоўку гэтага вялікага свята.
