Салезіянская cям'я прадставіла свой новы відэадэвіз на 2026 год, а беларускія салезіянскія супольнасці пераклалі яго на родную мову. Сёлетнім дэвізам сталі словы «"Тое, што Ён скажа вам, зрабіце" (Ян 2,5). Веруючыя, свабодныя, каб служыць».
Штогод дэвіз прапануецца як магчымасць для ўсёй салезіянскай сям'і сабрацца разам вакол пэўнай тэмы, каб праз малітву і разважанне, слуханне і дзяленне кожная група змагла знайсці натхненне для свайго ўласнага духоўнага, харызматычнага і пастырскага шляху.
У святле юбілейнага досведу дэвіз-2025 «Замацаваныя ў надзеі, пілігрымы разам з моладдзю» даў салезіянскай сям'і магчымасць ісці разам з усім Касцёлам, каб сузіраць таямніцу Хрыста, крыніцу і апору надзеі.
Канцэнтруючыся на тэме надзеі, якая не расчароўвае, салезіяне сузіралі, як таямніца Бога-Творцы, які наведвае чалавека ў сваім Сыне, працягвае яго падтрымліваць і сёння праз моц Духа. Надзея дапамагла паслядоўнікам святога Яна Боско распазнаваць знакі Бога ў штодзённым жыцці — канкрэтнай рэчаіснасці, якая адлюстроўвае таямніцу Божай любові.
Надзея — гэта, паводле салезіянаў, сіла і пацвярджэнне «ўжо», якое мы перажываем і сузіраем. Яна таксама з'яўляецца крыніцай мужнасці і радасці для «яшчэ не».
У перыяд вялікіх пераменаў і выклікаў разам з беспрэцэдэнтнымі магчымасцямі дэвіз-2026 «Тое, што Ён скажа вам, зрабіце» (Ян 2,5) мае за мэту быць духоўным падарожжам, якое прапануе компас для асабістага росту ў веры і росту ў пастырскім досведзе на ўзроўні супольнасці.
Таму групы салезіянскай сям'і і мясцовыя супольнасці прымаюць гэты заклік да слухання рэчаіснасці, укаранёнага ў веры ў Хрыста, каб жыць пакліканнем з сапраўднай свабодай.
Згодна з харызмай салезіянаў, гэта свабода, якая заклікае рабіць выбар на карысць маладых і ўсіх тых, хто пазбаўлены «віна» надзеі, і вядзе да ўмацавання адданасці сталаму паўнавартаснаму развіццю чалавека.
