14 мая свой 94-ы дзень нараджэння адзначаў найстарэйшы ўзростам каталіцкі святар у Беларусі ксёндз Юзаф Пятушка, які жыве і служыць у парафіі Маці Божай Фацімскай у Жодзіне. З гэтай нагоды Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі, кіруе яму словы віншавання.
Шаноўны ксёндз Юзаф!
Дазвольце ад свайго імя і ад імя Канферэнцыі Каталіцкіх Біскупаў у Беларусі, а таксама ўсіх вернікаў нашай краіны павіншаваць Вас з днём нараджэння.
Разам з Вамі мы сёння дзякуем Пану Богу за вашыя 94 гады жыцця, а разам з тым таксама 68 гадоў служэння Богу і людзям як святар.
Гэта праўда, што месца і час свайго нараджэння чалавек не выбірае, бо аб гэтым вырашае Бог праз любоў бацькоў. Аднак час, які прызначаны чалавеку на зямлі Богам, належыць чалавеку і ён напаўняе яго сваёй дзейнасцю. У Вашым выпадку гэта служэнне Богу і людзям. Таму нездарма малодшыя субраты марыяне называюць Вас «наш патрыярх» за прыклад святарства, якога яны вучацца ад Вас. Для многіх Вы сталі Элім XXI стагоддзя (пар. 1 Сам 3, 6), які скіраваў маладых беларускіх Самуэляў — малодшых братоў — на служэнне Богу.
Дзякуючы Вам, пачынаючы з 1992 года, была заснавана парафія Маці Божай Фацімскай ў Жодзіне і былі рэалізаваныя іншыя душпастырсія ініцыятывы Касцёла на Беларусі.
Напэўна, лёс, гэта значыць, час Вашага зямнога падарожжа, які прыпаў на выпрабаванні ліхалеццяў Другой сусветнай вайны, загартаваў Ваш характар і сфармаваў у Вас сэрца хрысціяніна. Тыя, хто хоць аднойчы сустрэўся з Вамі, адзначаюць, што ў поўні адчулі Вашу добразычлівасць і павагу.
Жадаем Вам, шаноўны ксёндз Юзаф, духоўнай моцы, заступніцтва Маці Божай Фацімскай, апекі святога Юзафа і доўгіх гадоў жыцця ў святарскім служэнні.
Plurimos annos!!!
З малітвай
✠ Арцыбіскуп Юзаф Станеўскі
Мітрапаліт Мінска-Магілёўскі
Старшыня Канферэнцыі Каталіцкіх Біскупаў у Беларусі
