28 і 29 верасня ў Навагрудку (Гродзенская дыяцэзія) адбыліся ўрачыстасці з нагоды святкавання 400-годдзя касцёла святога арханёла Міхала.
На працягу гэтых двух дзён, якія сталі кульмінацыяй святкавання юбілею святыні, у горадзе Міцкевіча адбываліся разнастайныя духоўныя, адукацыйныя і культурныя мерапрыемствы.
Урачыстасць распачалася ў суботу з гістарычных чытанняў, прысвечаных гісторыі касцёла Арханёла Міхала ў Навагрудку і дзейнасці айцоў дамініканаў.
Свае даклады ўвазе сабраных прадставілі навуковы супрацоўнік музея Адама Міцкевіча ў Навагрудку Мікалай Гайба і кандыдат гістарычных навук, выкладчык катэхетычнага каледжа імя Зыгмунта Лазінскага ў Баранавічах Раіса Зянюк. Адукацыйнае мерапрыемства сабрала вялікую колькасць зацікаўленых гісторыяй слухачоў.
Пасля гістарычных чытанняў адбылася ўрачыстая Эўхарыстыя, цэлебрацыю якой узначаліў біскуп Уладзімір Гуляй, новапрызначаны пастыр Гродзенскай дыяцэзіі. У гаміліі іерарх засяродзіў увагу на арханёле Міхале і неабходнасці пастаяннай духоўнай барацьбы з кожным грахом і злом.
Падчас святой Імшы адбылося благаслаўленне фігуры Маці Божай, якую ў дар прынеслі ўдзельніцы малітоўнага руху «Маці ў малітве».
У гэтыя святочныя дні жанчыны з гэтага руху з усёй Беларусі праводзілі ў Навагрудку свой з’езд і перажывалі рэкалекцыі.
Увечары першага дня святкавання адбылося ўзнагароджанне пераможцаў гістарычнай анлайн-віктарыны і конкурсу малюнка, у якіх узялі ўдзел каля 70-і дзяцей і падлеткаў з Навагрудка і Навагрудскага раёна. Пераможцам, якія занялі першае, другое і трэцяе месцы, былі ўручаныя адмысловыя падарункі, а ўсе астатнія ўдзельнікам атрымалі памятныя сувеніры.
На заканчэнне дня адбылося выступленне дзіцячага хору, а таксама некалькіх інструментальных калектываў з Навагрудскай раённай школы мастацтваў.
29 верасня, у патранальную ўрачыстасць святога арханёла Міхала, паўсотні вернікаў з розных мясцін Беларусі на ранішняй святой Імшы ўрачыста прынялі шкаплер святога арханёла Міхала — знак асаблівага заступніцтва Князя нябесных войскаў.
Сваім спевам літургію ўпрыгожылі ўдзельнікі праекту «Рыбы».
Апоўдні адбылася ўрачыстая цэлебрацыя Эўхарыстыі, якую ўзначаліў брат Юрый Кулай OCD, духоўны айцец руху «Маці ў малітве», а гамілію прамовіў брат Анатоль Ярошка OFMCap, дырэктар Caritas Мінска-Магілёўскай архідыяцэзіі. У святой Імшы ўзяла ўдзел вялікая колькасць гасцей з усёй краіны, а сваім спевам цэлебрацыю ўпрыгожыў хор Verum Cantus з Мінска, які адзначае сёлета круглую дату: 20-годдзе творчай дзейнасці.
Пасля святой Імшы адбылася Эўхарыстычная працэсія і цырымонія ўзнагароджвання памятнымі знакамі і сувенірамі сяброў парафіі і вернікаў, якія прымаюць актыўны ўдзел ў жыцці супольнасці.
Апошні святочны дзень завяршыўся пазнавальнай экскурсіяй са знаёмствам з экспазіцыяй па арганабудаванні, а таксама вечарынай араганнай музыкі ў касцёле-юбіляры.
Мерапрыемствы, прымеркаваныя да юбілею 400-годдзя касцёла святога арханёла Міхала ў Навагрудку, будуць праходзіць да канца 2024 года.
