20 ліпеня ў Браславе працягнуліся Чацвёртыя Агульнабеларускія дні моладзі, у якіх бяруць удзел больш за тры сотні юнакоў і дзяўчат з розных мясцін Беларусі.
Другі дзень моладзевага форуму распачаўся малітвай Ютрані ў санктуарыі Маці Божай Браслаўскай, Валадаркі азёраў.
Перад цудазейным абразом Багародзіцы моладзь са сваімі душпастырамі, а таксама з арцыбіскупам Юзафам Станеўскім і біскупам Алегам Буткевічам узносіла хвалу Богу на пачатку новага дня, просячы заступніцтва нябеснай Матулі.
Тэксты малітваў Літургіі гадзінаў сабраныя ў святыні прамаўлялі са сваіх смартфонаў.
Пасля сняданка юнакі і дзяўчаты, поўныя энергіі, з задавальненнем паўдзельнічалі ў розных гульнях на адкрытым паветры. Пляцоўку з забавамі для ўдзельнікаў Дзён моладзі на полі перад алтаром-караблём арганізавалі супрацоўнікі і валанцёры Дабрачыннага каталіцкага таварыства Caritas Мінска-Магілёўскай архідыяцэзіі.
Да маладых людзей далучыліся таксама іерархі. Арцыбіскуп Станеўскі паказаў клас у розных гульнях — настольных і рухомых, — а біскуп Буткевіч захапіў відавочцаў уменнем жангліраваць трыма мячыкамі.
«Але ж колькі яблыкаў я папсаваў, каб так навучыцца!» — з усмешкай прызнаўся пастыр Віцебскай дыяцэзіі, якая сёлета святкуе свой першы, 25-гадовы юбілей.
Потым удзельнікі Дзён моладзі зноў сабраліся ў касцёле, дзе для іх прамовіў духоўную канферэнцыю айцец Яўген Голуб OFNConv, малады францішканін з Івянца.
Святар прапанаваў моладзі паразважаць над цэнтральнымі праўдамі хрысціянскай веры, а потым, узяўшы гітару, заспяваў песню на хвалу Богу, якую падхапілі ўсе прысутныя.
Пачутым і перажытым юнакі і дзяўчаты дзяліліся падчас працы ў групах, пасля якой іх чакае дыялог з прысутнымі біскупамі.
Больш фота з Дзён моладзі — на старонках Catholic.by у сацыяльных сетках.
